A zawna vawi sarih chak Verstappen; McLaren record khumtu Red Bull

Car intlansiakna sang ber Formula 1 huangah mi bik a awm a, ani chuan tun hnai intlansiak hnuhnung pasarih zetah hnehna a chang fai vek, a hming chu Max Verstappen a ni.

Dutch tlangval hian Red Bull car a khalh a, a teammmate Sergio Perez nen kumina intlansiak awm tawh zawng zawngah hnehna an la inchan sem vek, team dang tan hmun an la kian ve miah lo.

Nikum intlansiak hnuhnung ber Abu Dhabi aṭang khan Red Bull hi an la chak ngar ngar a, an team chak zawn zat hi vawi 12 a tling ta. Kum 1988 daih tawha McLaren driver pahnih Ayrton Senna leh Alain Prost ten vawi 11 chak zawn record an lo siam tawh chu an rawn khum.

Pakhatna Max

Hungarian Grand Prix hi Lewis Hamilton-a tana hmun ṭha a ni ṭhin a, hnehna chang hnem ber pawh a ni. Qualifying lama a tlan ṭhat avangin Pathianni zana intlansiak takah pawh a hmasa ber aṭangin bul a ṭan.

Mahse, vawi sarih champion tawh Hamilton beiseina chu intlansiak tlan ṭan aṭanga second rei lote chhungin a thamral nghal tia sawi theih a ni, a hnunga awm Max chuan a rawn tlan pel nghal.

World champion ni lai Verstappen hian intlansiak a thunun chhunzawm a, harsatna lian tham tawk loin a chak tlang. F1 huangah hian vawi 44 a chak tling ta chiah bawk, a la chak chhunzawm zel pawhin a rinawm.

Pahnihna chu Landro Norris a ni a, a hma a tlan a phak lohna chu 33.7 seconds a ni - McLaren driver hian beisei phak baka ṭhain season hmang mek - Red Bull tana hnawksak zingah an tel phak a ni.

Hmahruai fal

Formula 1 season chanve an hmang chho mek a, champion lai Verstappen hian driver championship lama amah hnaih bertu Perez aiin point 110 zetin hma a hruai fel der tawh, a vawi thum nan a champion ngei hmel.

Kum 25 mi Verstappen chuan, "Ka tan chuan intlansiak nuam leh duhthusam a ni, kawng kawi hmasa ber kha hman ṭangkai a pawimawh dawn tih ka hresa a, ka tum ang taka ka ti hlawhtling thei kha ka lawm.

"Kan team chuan a zawnin vawi 12 hnehna kan chang thei, hei zet chu a ropui ngei mai. Tuna kan boruak ṭha leh thawhhona ṭha tak ang hi kan neih chhunzawm theih ngei ka beisei," tiin a sawi.

Red Bull driver pakhat zawk Perez chu Norris hnungah thlengin pathumna a ni a, Mexican driver hian kuminah ṭum hnih hnehna a chang tawh, a teammate a ṭhat em avangin atan pakhatna nih a harsa thung.

Red bull an lawm

Ferrari leh Mercedes ten hun rei tak chhung Formula 1 an thunun thei a, tun hma deuh khan Red Bull hian Sebastian Vettel hoin car intlansiakna sang hi an lo thunun ve tawh bawk.

Tunah Verstappen hoin Red Bull hian ro an rel leh mek a, team hlun zinga mi McLaren-in midang khum theih tawh loh tura ngaih, a zawna vawi 11 hnehna chan meuh an rawn khum ta, an phur hi thil mak a ni lo.

Red Bull team principal Christian Horner chuan, "Formula 1 hi nuam ka ti, ngaihtuah ngai leh khawih ngai a tam te hi nuam ka tih chhan a ni a, dan ang thlapa kan thawkho a nih chuan rah ṭha a chhuah ṭhin.

"Kar tawp kan hman dan hian khawvel a barakhaih tih kan hria, keimahni ngei pawh kan inbarakhaih tel bawk. Driver ṭha chungchuang bik Max kan nei hi kan vannei, ani hi chu F1 tana piang a ni," a ti.

Hmasawn ngai Lewis

Lewis Hamilton-a'n F1 title vawi sarih a la tawh a, car intlanisakna sangah hian a chunga leng an awm bik lo. Mahse, season hmasa khan F1 a luhchilh aṭanga chak ni hmel a hmuh loh vawi khatna a tawng, kuminah pawh a la chak lo.

Hungarian Grand Prix-ah a hmasa ber aṭangin tlan chhuak mah se a chak zo leh ta lo. Mercedes driver Hamilton chuan, "Kan team hian engkim kan nei ṭhain kan changtlung zawk, mahse a bul ṭhut a fuh a ngai.

"Zep tur a awm lo, team ṭha Red Bull tih dan hi kan entawn hreh tur a ni lo, an thawhhona a ṭha em em a ni," a ti a, intlansiak tir lam chu a F1 a hmachhawn tawh zinga a tih fuh loh berte zinga mi a nih thu a sawi bawk.

Tun seaon chhungin Formula 1 hi vawi 22 tlan tura ruahman a ni - Hungarian Grand Prix khan intlansiak 11-na a ni. July 30, Pathianni hian Belgian Grand Prix an tlan chhunzawm leh nghal dawn a ni.