Djokovic a hahchawl rih dawn

Novak Djokovic chu Toronto-a khelh tur Canadian Open aṭangin a inhnukdawk. August thlaa inelna neih tur a hmachhawn loh chhan chu, tun hnaiah a inkhelh tam a vangin a taksa a chauh vang a ni.

Kum 36 mi Djokovic hian tun hnai khan Wimbledon final a lut a, mahse grass court inelna lian berah hian world number 1 Carlos Alcaraz hneh loin a nomawi a hloh zui a, wold ranking lamah pawh pahnihna a ni zel.

A kum a tam ve deuh tawh a, atan tournament zawng zawng khelh vek a remchang tawh tawh. Serbian star hian ngun taka ngaihtuahin, a taksa dinhmun a thlir thiam tel a ṭul tawh hle a ni.

Grand Slam vawi 23 champion tawh Djokovic chuan, "Canada ramah hian hun nuam tak ka lo hmang tawh ṭhin, amaherawhchu kumin atan chuan ka inlan thei dawn lo, hei hi ka team lam nen kan sawi ho hnua kan thutlukna a ni.

"Tournament director Karl Hale pawh kan hrilh tawh a, ani hian ka dinhmun hrethiam taka min lo dawnsawn avang pawhin kan lawm hle," tiin a sawi a, a chawlh chen tur erawh a sawi tel lo.

Toronto Masters-ah hian Djokovic hi vawi lo a champion tawh. Tournament hi August 7 aṭangin an khel ṭan dawn a, world number 2 Djokovic a inlan theih dawn loh takah chuan American player Christopher Eubanks chu main draw aṭangin a inlan thei thung dawn a ni.