MBA Official Championship - A hun a thleng ta; Mizorama badminton inelna lian leh ngaihhlut hlawh ber

Mizoram Badminton Association (MBA) Official Championship 2023 - Senior chu vawiin hian khelh ṭan a ni dawn ta.

MBA leh Bawngkawn Badminton Club te ṭangdunin an buatsaih inelna hi Bawngkawn YMA Hall-ah neih a ni dawn a, July 29, Inrinni thleng inelna hi neih tur a ni ang.

Mizo Badminton player ṭha ber berten he inelna hi an hmachhawn dawn a, category panga - men’s singles, women’s singles, men’s doubles, women’s doubles leh mixed doubles-ah te inelna neih a ni ang.

Mizorama badminton thuneitu sang ber MBA-in ranking system a kalpui danah Official Championship hian double point a pu a, lawmman sumfai tamna ber tournament a nih bawk avangin a boruak a 'hot' lo thei lo.

Ṭhazuala telna

Badminton Association of India (BAI) chuan State Shampionship hi ngai pawimawhin BAI calendar-ah pawh a dah a, tun inelnaah pawh hian Mizoram pawn lama Mizo player ṭhate chu inelna hmachhawn tur hian an lo haw - Mizo player ṭha tamna Pullela Gopichand Badminton Academy (PGBA) leh ITM University Badminton Academy-a zirlai Mizo player-te pawh he tournament khel tur hian an rawn haw khawm.

All India Sub-Junior Ranking Badminton Tournament, Under-17 Boy’s Singles category-a vawi hnih champion thei H. Lalṭhazuala, Ralte Villa Badminton Club pawh Men’s Singles huangah a inlan dawn - inelna tihmuhnawm pha tur zingah a tel.

Ṭhazuala bakah hian Under-15 a national champion lo ni tawh leh vawi hnih final lut thei Malsawmhlua, Ralte Villa BC chu Men’s singles leh Men’s doubles category ah a inlan dawn a, Under-17 Boy’s Doubles, Lucknow-a neih zawh taka semifinalist, C. Lalramsanga, Ralte Villa BC pawh category pahnihah tho hian a inlan dawn bawk a ni.

MBA nena thawk mek Tata Trust leh PGBA ten Mizo naupang badminton zir mekte chu training lama insawr bing tura an duh avangin season khatah State level tournament pakhat bak an khelh a rem ti tawh dawn lo a, tun inelnaa inlan tur Mizo naupangte an hmuhnawm ang - kum khata state inelna an hmachhawn theih chhunah result ṭha lo neih an duh dawn lo.

A hmuhnawm dawn

Men’s singles category-ah entry 60 lai lutin, Mizorama badminton player ṭha chu an inlan kim vek dawn - MBA ranking-a mipa lama number 1 hauh mektu Malsawmsanga (Esha), Bawngkawn Badminton Club (BBC) chuan seeded no 1 ni chungin inelna hi a hmachhawn dawn.

Esha hi first round khelh ngai loin a bye-a, Ṭhazuala’n first round-ah a tumpui a hneh chuan second round-ah player ṭha pahnih an intawng thei dawn - Mizoram men's singles no.1 leh India U17 no. 1 te hi an inkhel a nih ngat chuan boruak a sang khawp ang.

Men’s doubles-ah Laldintluanga Tlau leh Lalrinawma (BBC) te ṭangdun chu seeded no 1 an ni a, anni pahnih hi tawn châkawm lo viau mah se champion chiang saa dah theih an ni lo - tun hnai lawka district level tournament-a an hneh zawh loh, Subam Yadav leh Steven Lalhriatpuia, Chanmari Shuttler Club (CSC) te ṭangdun nen intawng thei dinhmunah an ding.

C. Lalramzauva leh Joseph VL Ringngheta, CSC te chu seeded no 2 niin, Lalmuanawma leh Samuel Lalnunmawia, Mizoram Police BC te pawh an kum tam deuh tawh mah se seeded no 3 an la ni thei - boruak sangah chuan an tawnhriat ringawt pawh hi a ṭangkai leh ang.

Hmeichhe inelna

Mizoram badminton-a hmeichhe inelna sawi a nih chuan Abigail Lalṭhazuali, Saron veng Badminton Club hi a hming lam rik zel a ngai tawh. Ani hian seeded no. 1 ni chungin inelna a hmachhawn dawn a, record nei ṭha mah se champion tura a indah sa erawh a rem bik lo.

A chhan maw? Ralte Villa Badminton Club player chhuanvawr Lalrinhlui chuan he inelna hi champion ngei tumin a hmachhawn ve dawn - ani hi seeded no. 2 a ni thung. Women’s singles inelna hmachhawn turte player-te hi kum 15-22 inkar an ni hlawm a, an naupang tlang hle.

Women’s doubles inelna lamah senior player kan hmu nual dawn a, hetiang boruak karah hian Lalrinhlui leh Zothansangi, Ralte Villa BC te ṭangdun chuan seeded no. 1 ni chungin inelna an hmachhawn ang.

Mixed doubles huangah Laldintluanga Tlau, BBC leh Zorinkimi, Chaltlang BC te seeded no 1 ni chungin an hmel kan hmu dawn bawk a, category tin hi a hmuhnawm dawn, tia sawi ngam vek a ni.

Pafa ngatin

MBA Official Championship 2023 tingaihnawmtu pakhat chu pafaa inlan tur an awm hi a ni. Malsawmkima (Maski-a) te pafa, Mission Veng Badminton Academy-te chu men's singles leh women's singles-ah an inlan dawn.

Maski-a hi kum 53 mi ni tawh mah se men's singles lamah a la inlan dawn a, a fapa, kum 13 mi Vanlalhriatrenga chuan he category-ah vek hian inelna a hmachhawn ve dawn bawk - tun inelnaa tel thei upa ber leh naupang ber an ni nghal.

Hei chauh hi a la ni lo cheu - Maski-a fanu Lalrinkimi chuan women's singles lamah inelna a hmachhawn ve dawn bawk a, pafa thumin state level inelna an hmachhawn dawn tihn a ni!

MBA Official Championship 2023 hi a hmunah en theih a ni dawn a, entry fee a awm dawn lo - man chawi loa Mizoram mai ni lo, India rama hming chher mek player-te en theih an ni tur hi badminton ngainatu tan chuan a hlu takzet a, MBA chuan Mizo mipuite a hmuna inkhel en turin a sawm a ni.