Newcastle-in Barnes an la lut

UEFA Champions League khel tur Newcastle United chuan Harvey Barnes chu Leicester City aṭangin an la lut. English winger man zat hi puanzar ni lo mah se pound maktaduai 38 vel tura ngaih a ni a, kum nga daih contract a ziak. Barnes hi nimin zinga Newcastle leh Aston Villa te friendly match-a an inhmachhawn ṭumin bench aṭangin a lut nghal.

Magpies hian kum 25 mi Barnes an lakluh hma hian Italian international Sandro Tonali an la lut tawh a, player pahnih hi team tichak theitu ve vea ngaih a ni. Hei bakah hian kum 18 mi Yankuba Minteh chu Danish club Odense Boldklub aṭangin an la lut a, Gambian forward Minteh erawh intuai hriam turin Feyenoord-ah loan hmanga chhuahtir a ni thung.

Foxes an inpaih thawl

Season liam ta khan Premier League aṭangin Leicester City hi an tla thla a, Championship-a an khelh dawn avangin first team player an chhuah nual.

Barnes hma hian James Maddison-a'n Tottenham chu pound maktaduai 40-in a zawm. Foxes hian player hralhna aṭangin pound maktaduai 80 bawr vel an la lut.

Chutihrualin Premier League-a player vantlang ni pha midfielder Youri Tielemans, defender Caglar Soyuncu, defender Nampalys Mendy leh winger Ayoze Pérez te chuan free transfer-in club dang an zawm. Foxes-in Championship-a an tlak avangin sum an chân nualah a ngaih theih.

Foxes chhul chhuak

Harvey Barnes hi December 9, 1997 khan Burnley-ah a piang a, kum kua a nihin Leicester City zawmin Foxes chhul chhuak a ni. English winger hian intuaihriam turin MK Dons, Barnsley leh West Brom-ah te loan-in a chhuak tawh a, hming a chherna ber erawh Leicester City a ni.

Kum 2019 aṭang khan Barnes hian Leicester-ah hmun pawimawh a chang chho a, thahrui a ngah avangin mual sir aṭangin a hmuhnawm ṭhin hle. Premier League-ah match 146 khel tawhin goal 35 a khung a, assist vawi 25 a nei tawh bawk.

Barnes chuan, "Leicester City chhuahsan tura thutlukna siam hi a harsa ka ti hle. Kum kua ka nihin Leicester hi ka zawm a, hun duhawm tak kan hmang dun. Engtik lai pawhin ka thinlungah hmun pawimawh a chang reng ang," tiin Foxes a thlah.

Magpies lawmna

English winger Barnes hian mual sirah 'trick' a ngah hran lo a, step over emaw style deuh hleka khingpuite bum emaw pawh a nei hran lo.

Barnes hian thahrui hmangin a khingpuite a bum a, full back paltlang nan wall pass a hmang nasa a, ṭhiante a siam theih bakah goal a khung thei bawk.

Magpies boss Eddie Howe-a'n thahrui nei player a ngai pawimawh tih a lang a, a hman thiam tur tak player a la lutah a ngaih theih. Howe chuan, "Barnes hi ka hriatna a rei tawh a, a khelh dan hian ka mit a la hle. Mual sir aṭangin goal khung tumin rilru a seng ṭhin a, a theihna sang tak hi team tan a ṭangkai ngei pawh ka ring a ni," tiin a player thar a fak.