Season liam ta aiin Haaland a ṭha tawh zawk - Pep

Manchester City chuan Pathianni zan khan Tokyo-ah mualneitu Yokohama F Marinos chu 5-3 in an hneh. Inkhelh banah Pep Guardiola chuan goal hnih khungtu Erling Haaland chu season liam ta aia a ṭhat tawh zawk thu a sawi.

Premier League champion lai City hian transfer-ah Mateo Kovacic chauh an la lut a, season liam taa captain Ilkay Gündogan a chhuak thung. City player dang Kyle Walker, Joao Cancelo bakah Riyad Mahrez leh Bernardo Silva te chhuak thei dinhmunah an ding.

City player pawimawh chhuak tura an hming sawi a nih vang hian Pep leh a hote an talbuai phah lo. Yokohama F Marinos lakah hian Walker chuan captain armband a hreng a, Cancelo pawh second half-ah lutin assist a nei bawk.

Tokyo-ah mualneitu Yokohama an che ṭha a, goal pawh Anderson Lopes (27') leh Ken Matsubara (38') te hmangin an khung hmasa zawk. Mahse, first half chhung vekin John Stones (41') leh Julian Alvarez (43) te hmangin City-in siphurh an sut zo.

Second half-ah Erling Haaland luhtir a ni a, minute 53-naah hmahruaina goal khungin Rodri-a'n minute 72-naah a khung leh bawk. Yokohama tan Kenta Inoue-a'n minute 86-naah khung leh mah se Haaland-a'n injury time-ah chak nemnghehna goal a khung.

Inkhelh banah Pep Guardiola chuan, "Kovacic a khel ṭha a, chutihrualin kan duh dan a hriat a ngai. A vawi khat khelhna chauh a ni," tiin player thar chungchang a sawi.

Spanish manager chuan sawi chhunzawmin, "Erling Haaland hi season liam ta aiin a fitness a ṭha zawk a, amah hrim hrim pawh a ṭha tawh zawk. Inhliam loa season a hman tluan a pawimawh dawn a, chutihrualin midang ang bawkin inbuatsaihna ṭha an la mamawh," tiin a sawi.

Man City hian July 26, Nilaini tlai dar 4:00 hian Bayern Munich an hmachhawn leh dawn a, Bavarians nena sawizawm Walker chu friendly match-ah hian a khel dawn lo niin khawthlang media ten an ziak.

Man City tana inlante

Man City XI: Ortega Moreno, Walker, Stones, Akanji, Ake, Phillips, Kovacic, McAtee, Palmer, Grealish, Alvarez.

Second half-a lut: Cancelo (45'), Dias (45'), Laporte (45'), Lewis (45'), Rodri (45'), Foden (45'), Bernardo (45'), Perrone (75'), Bobb (45'), Gomez (45'), Haaland (45')

Player inlan lo: Ederson, Carson, De Bruyne