Magpies leh Villa an inhnehtawk

Philadelphia-ah Newcastle United leh Aston Villa ten nimin khan friendly match an khel a, 3-3 in an inhnehtawk. Inkhel dangah Fulham-in Brentford 3-2 in an hneh. Inelna hi Premier League Summer Series hming vuah a ni a, English club paruk Chelsea, Fulham, Aston Villa, Newcastle United, Brighton & Hove Albion leh Brentford te an inel a ni.

Lincoln Financial Field-ah Villa-in bul an ṭan ṭha a, Argentine midfielder Emi Buendía a khel ṭha hle. Minute sarihna lekah Buendia thawhrah sengin Ollie Watkins-a'n a pet goal a, minute li hnuah Buendia-a'n mual vei lam aṭangin cool takin a khung leh bawk.

Newcastle an insiamrem a, Elliot Anderson-a'n minute 28-naah Aston Villa offside trap bumin goal ṭha zet a khung. First half injury time-ah Villa tlarhnungin keeper dan per an pet chhuak thei lo a, Alexander Isak-a'n chiang takin a khung.

Second half-ah Villa bawkin bul an ṭan ṭha a, keeper Martin Dúbravka-a'n ṭha takin dang mah se goal ban a per hnuah Emi Buendia-a'n awlsam takin a khung. Newcastle pawhin Villa thun dan ang thoin an chhanglet, Anthony Gordon ball pet chu keeper Robin Olsen-a'n dang perin minute 55-naah Callum Wilson-a'n awlsam takin a khung. Goal dang a luh belh lo a, 3-3 in inkhel a tawp.

Premier League Summer Series hi US-a khawpui panga Atlanta (Georgia), Harrison (New Jersey), Orlando (Florida), Philadelphia (Pennsylvania) leh Summerfield (Maryland) ah inelna hi neih a ni a, vawi khat ṭheuh inkhelh kual hnuah a sang ber an champion ang.