Real tan Bellingham a inlan ta
English midfielder duhawm leh ṭhangduang Jude Bellingham chuan Real Madrid tana a match hmasa ber a khel ta a, pre-season match-ah Real hian AC Milan chu 3-2 in an hneh.
AC Milan hian fiurst half chhungin Fikayo Tomori leh Luka Romero hmangin goal hmahruai khung mah se, second half-ah Real an 'comeback' a, Federico Valverde leh Vinicius Jr chuan goal khat ve ve khungin, 3-2 in an chak.
Kum 20 mi Bellingham a hmuhnawm takzet - vawi hnih zet chu Rose Bowl-a fans 70,000 pungkhawm chuan a chet dan hmuhnawm zet avangin an lawm hial a, Bellingham tan chuan hriatreng tawh tur friendly match a tling hial ang.
Real hian July 27 zingah USA tour-a an match hnihna an khel lehnghal dawn a, Manchester United an hmachhawn ang - Red Devils bakah hian Barcelona leh Juventus an tawng leh dawn bawk.
Real hian Milan lakah 4-1-2-1-2 formation hmangin Bellingham hi number 10-ah a awm a, a hmaah amah ang thoa tun season-a Real pantu Joselu leh Milan-a loan-a a khelh hnua kir Brahim Diaz te an awm.
Toni Kroos chu midfield hnung dawltu atana hman niin, Valverde leh Eduardo Camavinga te chu a hma chiahah an awm a, hei hian Bellingham hi a duhthala tal tura zalenna pein, a che vel chu mit titlai a tling takzet.
Real boss Carlo Ancelotti chuan, "Ani ang player thiam bik hi chu hmuh an harsa êm êm. Kum 20 chauh a la ni a, hma a la sawn belh thei - ani ang player kan nei hi kan vannei takzet a ni.
"Player hmuhnawm tak a ni a, ball kalpui dan tur a hria a, a che vel a hmuhnawm a, hmun awl a zawng thiam êm êm bawk," a ti a, Bellingham an chang thei chu vannei a inti hle.
Real chuan Bellingham lei nan hian pound maktaduai 88 zet an seng a, a khelh ṭhat dan a zirin a man hi £115mtd thlenga sang chho leh thei tur a ni - Borussia Dortmund aṭanga an lakluh player hian Santiago Bernabeu-ah kum ruk chhung khel turin contract a ziak.
Kum 17 mi lek ni chunga Birmingham City chhuahsan a, Dortmund pantu midfielder hian Real-ah hian number 5 a ha a, Spanish club player chhuanvawr leh coach hlawhtling ni zui Zinedine Zidane-a hak ṭhin a nih avangin a lakah beiseina a sang ang.