Dortmund pan tur Sabitzer

Borussia Dortmund chuan an elpui Bayern Munich aṭangin Marcel Sabitzer an lalut dawn. Sabitzer-a man hi euro maktaduai 19 vel tura ngaih a ni.

Kumin January thla khan Sabitzer hi loan hmangin Manchester United-ah a kal a, Austrian midfielder hian Premier League match 10 khelin inelna hrang hrangah match 18 a inlan.

Kum 29 mi Sabitzer hian Old Trafford-a cham duh mah se United hian chelh an tum lo a, Bayern-ah a kir a ṭul phah. Bavarians-in friendly match-a Rottach-Egern 27-0 a an sawp ṭum khan Sabitzer hian goal nga ngawt a khung a, club hotute mit erawh a tlung pha ta chuang lo.

Bayern leh Dortmund te hi Bundesliga-a club inel ber ni mah se player an inlei tawh nasa ṭhin hle. Bavarians hian BVB duh lai an chhuhsak a, an duh loh hi an thawnlet a ni ber.

Tun season-ah pawh Bayern hian Raphaël Guerreiro an chhuhsak a, chutihrualin tun hnai kum riat chhungin Bavarians hian Niklas Sule, Mats Hummels, Mario Gotze leh Sebastian Rode te chu Dortmund lamah an kaltir thung.