Al Hilal-in ât an so - Mbappe an ngam huai!

Saudi Pro League club-te chanchin sawi a bang thei lo - Al Hilal chuan khawvela footballer man to ber ni turin Kylian Mbappe lakluh an tum a, Paris St-Germain hnenah French forward hi pound maktaduai 259-a lei chhuah an dil!

Kum 24 mi forward hian PSG-ah kum khat cham turin contract a la nei a, kum khat dang pawhsei theihna dan a neih chu a pawhsei duh loh avangin PSG nen an inhmu thiam lo a, Japan-a pre-season tour an neihah pawh hruai a ni ve lo.

PSG chuan Mbappe hi a contract zawh huna a thlawna chân ai chuan, man a neih theih laia man to taka chhuahtir an duh a, French club hian Al-Hilal hi Mbappe be turin phalna an pe nghal.

Kum 2017 khan PSG hian Barcelona aṭangin Neymar chu £200mtd-in an lo lei chhuak tawh a, hei hi khawvela footballer man to ber record ding lai a ni - Mbappe hian Al Hilal hi a pan a nih chuan record hi a khum ang.

A bul ṭanna

Mbappe hian kum 2017 khan AS Monaco aṭangin PSG hi a zawm a, hetihlaia a man zat hi pound maktaduai 166 niin, khawvela footballer man to pahnihna a ni - PSG hian heti zat sum senga an lakluh hi a thlawna chhuahtir an duh lo.

Season hmasa ṭan dawn khan Real Madrid chuan Mbappe hi lakluh tumin an lo dawr tawh a, mahse, Madrid khaw club a pan mai dawn emaw tih hnuah PSG hian hnar rual loh sum tawktarhin thuneihna thlengin an pe tel a, an chelh.

Mahse, season khat a liam a, Mbappe hian kum khat danga contract pawhsei theihna dan awm chu a pawtsei duh lo a, PSG thuneitute hnenah a contract chu pawtsei loa a hman zawh tur thu a sawi.

Lal fapa ang maia dawm a, a lam apiang an pek Mbappe chet dan hian PSG thuneitu lam a tithinur a, contract thar a ziak dawn lo a nih chuan kawl reng a ṭulna an hre lo - sum tak tak hloh an duh lo a, Mbappe hi chhuak se, an ti.

Heltu an tam!

PSG-in Mbappe chhuahtir an duh laiin a player berin chhuah a duh lo a, an buai zo. French club thinrimin pre-season tour-ah an hruai duh lo a, a chhuak lo a nih chuan season tluana chhawr loh pawh an pawi ti lo, tih thlengin an sawi!

French club hian Mbappe hi Real Madrid nen indawr rengah an ngai a, a contract zawh huna a free-a Spanish club zawm a tum niah an ngai - hei tak hi PSG chuan 'na' an ti a, an player hi sum hui luh nan hman an tum.

Player leh club inkar boruak hrechiangtu Chelsea, Manchester United, Tottenham, Inter Milan leh Barcelona ten Mbappe an duh thu hi an tilang tawh a, vantlang hriata thawm nei duh lo Real hi Mbappe la lut turin an inring tawh hle, nia sawi an awm bawk.

Mbappe leh PSG boruak leng vel karah chiang lo tam tak a awm a, tun dinhmuna chiang ber chu Al Hilal lamin an dawrna hi a ni - sum hmanga thlem lungawi awlsam tak forward hi Saudi Pro League lamah kan hmu lo ang, tih a sawi theih loh.

A tam dawn

Al Hilal hian Mbappe man atan an ngam sang a ni mai lo a, awihawm lo khawpa tam hlawhtir an inhuam - khawthlang media-ten an tarlan dan chuan Saudi club hian kum khata euro maktaduai 700 hlawhtir an tum!

Hei chauh a ni lo. Al Hilal hian kum khat hnuah Mbappe hi a duh a nih chuan a thlawna Real Madrid a pan an phalsak dawn nia sawi a ni a, France captain tan uluk taka ngaihtuahna sen a ṭul dawn tih a lang chiang.

Mbappe hian PSG-a cham thlang lui ta tlat se, a lan dan chuan PSG hian an chhawr dawn chuang lo. Real tan lah, season tawp ruala a thlawna lak theih tur lakluh nana sum tam tak lo sen chu thil âtthlak tak niin a lang bawk.

A tawi zawnga sawi chuan Mbappe tan Al Hilal pan hi a 'ṭha nghahna' a ni thei a, a hlawh tur zat ngaihtuah phei chuan Saudi pan mah se dem a harsa viau mai thei - €700mtd hi khawvela footballer tam zawkin an career chhung zawnga an hlawhchhuah aiin a tam zawk.

Mbappe & PSG

May 2022: Mbappe-a'n Real sawmna hnarin, PSG-ah contract thar a ziak a, thla khatah euro maktaduai ruk chuang a hlawh niin an sawi.

December 2022: World Cup final-ah France tan hattrick a siam a, mahse, penalty-ah Argentina ngam loin Lionel Messi leh a ṭhianten hnehna hlado an chham khum.

March 2023: Hugo Lloris chawlh hnuah France captain atan ruat a ni.

April 2023: A career-a a vawi ruk nan Ligue 1 nomawi a chawi a, PSG tana vawi nga a chawina a ni.

13 June 2023: Mbappe-a'n PSG-a cham a duh thu twitter kaltlangin a puang a, mahse, 2024 piahlam thlenga cham erawh a tum loh thu a sawi.

5 July 2023: PSG president Nasser Al-Khelaifi chuan Mbappe chu an hnenah cham a duh a nih chuan contract thar a ziah a ṭul tur thu a hrilh.

9 July 2023: France Football magazine-in an kawmnaah PSG chu club thurualpui har tak an nih thu a sawi.

21 July 2023: Japan leh South Korea-a pre-season tour nei tur PSG squad-ah telh a ni ve lo.

22 July 2023: French footballers' union chuan PSG chu an tour squad aṭanga Mbappe an paih avangin French striker rilru tibuaiah an puh a, dan anga hma an lak theih thu an sawi.

24 July 2023: Saudi Arabian club Al Hilal chuan khawvela footballer man to ber ni turin £259mtd-a Mbappe lei an dil a, PSG chuan hei hi pawmin direct-a Mbappe biak phalna an pe nghal.