James leh Davis awmna Lakers an fawr

LeBron James leh Anthony Davis te inkawp chu Los Angeles Lakers tan chakna a nih laiin, an khingpui Miami Heat tan erawh anchhia mai an ni thung. Nimin zing NBA Finals game 1 inkhelah Lakers hian 116-98 in hnehna an chang.

October 3, Inrinni zing dar 6:30-ah game 2 an khel leh dawn, basketball thiam ber nomawi chawi tur chuan a tlem berah game li tal an lak a ngai. Match hmasa berah chuan Western Conference champion lakah eastern conference aiawhtu an tlawm phawt.

AdventHealth-Arena a inkhelah ṭan phat aṭangin Miami Heat an hlauhawm nghal, inkhel tir lamah point 13 ngawtin an sang fal nghal. Mahse, an lawm chhung a rei lo, quarter hmasa ber a zawh meuh chuan Lakers lamin 31-28 in an lehthal hman!

Lakers coach Frank Vogel-a'n a player a siksawi nasa a, chawlhlawk thlenga an point hmuh 65 zinga 20 chu bench aṭanga lut tena an score a ni. Half time an hman meuh chuan chak tur a chiang thawkhat tawh, quarter hnuhnung berah Heat rawn kang ve leh deuh mah se awmzia a awm tawh lo.

Season duhawm hmangtu Anthony Davis-a'n Lakers tan point 34 ngawt a nei leh a, an thiampuipa James chuan point 25 nei leh bawkin match dang ang bawkin team innghahna an ni leh. Heat lamah Jimmy Butler (23 points) thlawp zo an awm meuh lo thung.

A vawi li nana NBA champion nih tum James chuan, "Hna kan la zo lo, hmabak leh hmasawnna tur lai kan la nei. Game 1 a hnehna chan hi lawm chiam tur a la ni lo ang," a ti. Lakers forward Davis pawhin Heat chu team ṭha an neih avangin fimkhur a pawimawh thu a sawi ve bawk.

Lakers hian season 10 hnua a vawi khat nan NBA title lak leh an beisei a, an legend Kobe Bryant thih kum a nih avangin champion an duhna a sang zual. An chesual viau a nih ngawt loh chuan an hlawhtlin ngei pawh a rinawm.

James leh Davis chungchang sawiin Lakers coach Frank Vogel chuan, "Inkhel boruak a san zawh poh leh an theihna hi a sang zel a nimai," tiin a player pahnih a dahsan thu a sawi, American player ropui pahnih lakah rinna a nghat ngam hle.