Nadal tan hna a awlsam

Rafael Nadal tan French Open khelh laiah hna hautak thawh tur a la awm lo. Vawi 12 champion tawh Nadal hian Nilaini zan khan a khingpui Mackenzie McDonald chu 6-1, 6-0, 6-3 a sawpin second round a paltlang.

Court Philippe-Chatrier a inkhelah Nadal-a'n game li chauh a hloh a, darkar khat leh minute 40 chhungin a service a hloh miah lo bawk. American tlangval McDonald tan champion lai hi a 'u' mah mah deuh a, kawng engkimah a phak lo a ni.

Kum 34 mi Nadal chuan, "Paris khawpuia inkhelh hi chu a nuam ṭhin, a bik takin Philippe Chatrier Court a inkhelh hi chu a nuam veng veng. Tuna ka thil tum chu a ṭha thei ang bera khelh chhunzawm zel a ni ang," tiin nomawi lampang a la sawi duh rih lo.

Grand Slam vawi 19 champion tawh Nadal hian a match lehpek atan zanin hian Stefano Travaglia a hmachhawn leh ang. Italian player hian inkhel dangah Japan tlangval Kei Nishikori chu 6-4, 2-6, 7-6 (7), 4-6, 6-2 in a lo hneh ve thung a ni.

Inkhel dangah Alexander Zverev chuan fiahna hautak a patlang. German tlangval hian set hmasa pahnih a hloh bakah, a khingpui Pierre-Hugues Herbert-a'n set point a hmuh tawh chu pawtthla lehin 2-6, 6-4, 7-6 (7-5), 4-6, 6-4 in a chak hram.

Stan Wawrinka pawhin kawng dik a la zawh zel, a match hmasa bera Andy Murray a hneh hnuah Wawrinka hian world number 61 Dominik Koepfer chu 6-3, 6-2, 3-6, 6-1 in a hneh; tualchhung tlangval Hugo Gaston nen an inkhel leh ang.

Champion tura rinkai zinga mi Dominic Thiem pawhin harsatna ala tawk lo. US Open champion hlim hian Jack Sock 6-1, 6-3, 7-6 (8-6) in a hneh a, inbuatsaihna nei mumal hman lo mah se a khel ṭha tluang rih hle.

Austrian star Thiem hian tun hmain French Open hi final vawi hnih a khel tawh, mahse Nadal a ngam lo. Kuminah hian New York khawpuia hlawhtlinna a chan hnuah Paris a pan a ni a, a kaltluang a nih chuan champion lai Nadal nen semifinal-ah an intawng ang.