Spurs-in Vinicius an hnaih

Tottenham Hotspur chuan season khat chhung loan a khel turin Benfica striker Carlos Vinicius an lalut hnai a, Jose Mourinho-a'n Harry Kane thachhang dawltu tur a zawnna chu a tawp dawn hnai ta niin a lang. 

He thu buatsaih a nih lai hian club pahnihin indawrna an kalpui mek a, kum 25 mi striker hi Spurs hian loan a an hawh zawh hunah a ngheta lakluh theihna dan an nei dawn - a man erawh pound maktaduai 40.83 a ni ang. 

Season hmasaa Benfica tan league match 32 a goal 18 khungtu striker hi Portuguese league sang ber Primeira Liga-ah top scorer a ni a, inelna hrang hrangah match 47 khela goal 24 khungin assist vawi 13 ngawt a nei thei a ni. 

Brazilian club tenau Caldense aṭanga a career ṭantu striker hian a career ṭantir lamah Serie D, State league leh Portuguese second division-te a khel a, 2017-18 season a Portuguese second division club Real S.C tan match 39 a goal 20 a khung hnuin ngaihven a hlawh ṭan. 

January 2018-ah Napoli nen inremna neiin July-ah a zawm a, mahse Primeira Liga club Rio Ave lamah loan a chhuahtir zui niin match 20-ah goal 14 a khungsak a, January 2019 khan loan thoin AS Monaco a zawm. 

French club-ah beisei phak loin match 16-ah goal hnih a khungsak a, July 2019 khan euro maktaduai 17-in Benfica hi kum nga chhung atan a zawm. 

Portuguese champion team a a contract-ah hian euro maktaduai 100 a leichhuah theih a nih thu inziak mah se euro maktaduai 45-in season khat hnuah Spurs a zawm thei dawn. 

Brazilian striker Vinicius hian Portuguese football a hming a chher anga Spurs tan a khel thei a nih chuan Jose Mourinho team tan a ṭangkai khawp ang.