Goal li khungtu Liverpool-in goal li an chhuah

Germany-a an pre-season tour match hnuhnung zawkah Liverpool-in goal li an khung a, an lamah goal li a luh ve tho avangin an chak zo lo - second division club Greuther Fürth nen 4-4 in an inhnehtawk.

Liverpool tan Luis Diaz, Darwin Nunez leh Mohamed Salah ten goal an khung vek a, Nunez hian goal hnih a khung - Reds hian season tharah pawh goal khung kawngah harsatna an tawk dawn lo niin a lang a, tlarhnung erawh ngaihtuahna sen ṭhat a ngai.

Second division club lakah Liverpool-in goal li an chhuah a, Julian Green leh Lukas Petkov te chuan goal khat ve ve khungin, Armindo Sieb chuan goal hnih a thawh bawk.

Liverpool hian nipui transfer-ah Alexis Mac Allister leh Dominik Szoboszlai an lakluh avangin an che ṭha thawkhat tiin a sawi theih a, mahse, tlarhnung lamah an inthuamṭhat loh chuan season tharah pawh beisei an phak lo thei - an elpui tur zingah Manchester City an la tel.

Reds manager Jurgen Klopp chuan, "Germany-a kan camp hnuhnung ber a ni a, zin reng chunga inkhelh hi chu a hautak ve deuh ṭhin. Mahse, chu chu thil nihphung ve reng a ni a, paltlang a ngaih ang takin kan paltlangin ka hria. A pawimawh ber chu inhliam kan awm lo kha a ni," a ti - Szoboszlai chu Greuther Fürth lakah hian hliam vangin a inlan lo a, ngaihtuahawm a ni lo thung.

Klopp chuan goal li chhuah erawh pawmzam a harsat thu sawiin, "Tumahin goal li chhuah hi chu an duh lo. Mahse, second half-ah khan inhmuin ka ring a, game awmze nei tak khelh kan tum a, mahse, kan rilru kan seng tlai hret zel.

"Ball kan pass chhuak tlai a, ball kan khawih hmasakin kan tifuh tawk lo a, chumi avang chuan an rawn khel ṭha ta sawt a ni. Chutihrual chuan goal nalh leh mawi êm êm kan khung tho a ni," a ti a, lungawi a zir.

Klopp chuan sawi zawmin, "Mimal taka khel ṭha player an awm nual a, chu chu a pawimawh lai ber chu a ni. Kan vaiin minute 50 vel khelhna hun kan nei ṭheuh a, tumah an inhliam lo. Camp hlimawm tak a ni a, kei pawh ka hlim hle," a ti a, Germany-in an dawnsawn dan chu lawmawm a tih thu a sawi bawk.

Liverpool hian Singapore lamah pre-season tour an neih chhunzawm dawn a, hetah hian Leicester City leh Bayern Munich te nen an intawng ang - Premier League ṭan hmaa an match hnuhnung berah season thara Bundesliga khel tur Darmstadt nen Preston khawpuiah an inkhel leh ang.