Striker zawn kawngah hma kan sawn - Ten Hag

Manchester United manager Erik ten Hag chuan striker zawn kawngah hma an sawn tih a sawi. English club hian hming langsar Paris St-Germain forward Kylian Mbappe leh Tottenham striker Harry Kane te chu an hmalam hun a chiang lo chungin an dawr lo a, Old Trafford pan thei tura ngaih ber chu Denmark international striker Rasmus Hojlund a ni.

Striker chungchang sawiin Ten Hag-a chuan, "Hma kan sawn a, thil kal dan kan hria," tiin duhthusama a kal chak theih loh thu a sawi. Dutch manager chuan sawi chhunzawmin, "Kan tih theih chinah chuan kan theihna zawng zawng kan chhuah. Team ṭha tak din theih nan player kan lak tur angte lak fel hma hi a pawimawh. Kan duh ang chuan thleng vek se, kan zingah a tel tawh ang. Mahse kan duh angin a thleng vek ṭhin lo," tiin a sawi.

Man United hian season liam ta khan Premier League-ah goal 58 chauh an khung a, a sang paruk zingah goal an khung tlem ber. Goal nawr kawngah hma an sawn a ṭul tih a lang a, hmasawnna kawnga awlsam ber chu player ṭha lakluh a ni.

English club hian Hojlund lakluh tumin Atalanta an dawr mek a, inremna an la nei thei lo. Chutihrualin Italian club hian Mali forward El Bilal Toure chungchangah Spanish club Almeria nen inremna an nei tih an sawi a, Hojlund thlakna tur an ngaihtuah fel tawhah a ngaih theih.

Man United hian tlarhmaah Anthony Martial an nei a, French forward hian theihna sang tak nei mah se inhliamin a tlakbuak ve reng. Pre season bikah England forward Jadon Sancho chu false nine a chhawr a ni a, season liam ta khan Sancho hian league-ah goal ruk chauh a khung avangin hmatawnga rin ngam chu a har ang.