A tawn chinah Hamilton a lungawi

Lewis Hamilton chuan Formula 1 intlansiak an neih hnuhnung ber Hungarian Grand Prix-ah pakhatna ni lo mah se a thlen chinah a lawm tih a sawi a, season hman hmabak an la neihah a tan hun ṭha a inherchhuah a beisei.

Mercedes driver hi tlan chhinna lamah a che ṭha, hei vang hian intlansiak tak takah pawh a hmasa ber aṭangin a tlan ṭan. Mahse, kawng kawi hmasaah Max Verstappen chuan a tlanpel nghal a, a tawp thlengin Red Bull car hi a um phak ta lo.

Palina dinhmun luahtu Hamilton chuan, "Max-a kha a tlan ṭha em em a, chutihrualin kawng sir lamah min nek chhuak ta mah mah a ni. McLaren driver pahnih an tlan ṭha bawk a, anni ho kara palina nih theih kha a lawmawm.

"A tir lama kan inum tak tak kha chuan ka car kha a ṭha tawk lo deuh niin ka hria, a nghet tawk loin ka hre bawk. A hnu lamah erawh harsatna nei loin ka khalh chhunzawm thei ta a ni.

"Season hmasa ka hman dan leh kumina kan tlan tawhna te ka thlirkir a, ka tan chuan palina nih phak hi a chhe lo. Intlansiaka hnehna chang tur chuan qualifying tlan ṭhat a ngai, chumi chu kan ti thei tawh niah ka ngai bawk," a ti.

Britain tlangval hian F1 title vawi sarih a la tawh, champion hnem lamah Michael Schumacher nen an intluk mek - champion hnem ber ni fal tur chuan vawi khat tal hlawhtlinna a chan leh a ngai dawn.

Tun hnai season hnih chhung chu Red Bull leh an driver ṭha Verstappen a ngam lo, kuminah pawh a ngam lo mek. Hamilton hi kum 38 mi a ni tawh a, a hun hnuhnung lam a nih tawh avangin record thar siam chu a harsa tawhin a rinawm.