Arsenal hmachhawn kan châk tawh - Gundogan

Barcelona midfielder thar Ilkay Gundogan chuan Arsenal hmachhawn tura an inpeih thu a sawi. Gunners nen hian season thar inbuatsaih nan Ningani zing dar 8:00-ah an intawng dawn a ni.

Catalan club hian Juventus nena an inkhelh tur chu damlohna avangin an lo ṭhulh tawh. Tunah chuan Los Angeles khawpuia inkhel turin an inpeih tawh a, an player damlo ho pawh an dam fel tawh niin a lang.

Manchester City captain hlui Gundogan chuan, "Tunah chuan Los Angeles khawpuiah hlim takin kan awm. Arsenal nena inkhelh kan châkin kan phur tawh a, fans lam pawhin min thlawp ṭhat ngei kan beisei," a ti.

Ruahman dan chuan Gunners nen an inkhelh hnuah Real Madrid nen an inkhel leh dawn a, Spanish club lian pahnih inkhel tur hi friendly match ni mah se a boruak pawh a sang leh ngeiin a rinawm.

Mikel Arteta enkawl Arsenal tan Barcelona nen an inkhel tur hi a pawimawh, an player thar pathum Declan Rice, Kai Havertz leh Julian Timber an chhawrna inkhelah Manchester United ngam lo hlim an ni a, insiamṭhat an tum ang.

Premier League club Gunners hian bazar nan sum an hmang hnem a, season thar inbuatsaih nan Barca bakah AS Monaco chauh hmachhawn tur an nei tawh, an hun neih a tam tawk lo; chuvangin a ṭha thei ang bera hman a pawimawh.