United kawr ha thei dinhmuna ding Hojlund

Manchester United-in striker an mamawh a, no. 9 an lak hmain midfielder Mason Mount leh goalkeeper André Onana te an la lut. Tunah chuan striker an melh a, hming langsar melh loin ṭha thei tura ngaih Rasmus Hojlund nen sawizawm an ni.

Tu nge Hojlund?

Hojlund hi Denmark khawpui Copenhagen-ah February 4, 2003 khan a piang a, an ram club ṭha Brondby leh Copenhagen aṭangin a inzir. Kum 17 mi lek a nihin Copenhagen tan a khel a, UEFA Europa Conference League qualifier leh inelna takah goal nga a khung.

January 2022-ah Austrian club ṭha Sturm Graz a zawm a, a man hi euro maktaduai 1.8 a ni tawh. Match 21 khelhsak hmanin goal 12 a khung a, Atalanta-in a theihna hriain euro maktaduai 17-in an lalut.

Season liam ta khan Hojlund hian Serie A match 32 khelin goal kua a khung a, inelna hrang hrangah match 34 khelin goal 10 a khung. Season ṭantirh lamah bench aṭangin a lut ṭhin a, season tawp lamah hmun pawimawh a chang chho chauh.

Europe club liante mit a lakna erawh club ni loin ram tana a khelh ṭumin a ni a, nikum September thla aṭang khan a khel ṭan chauh. Finland lakah bul a ṭan a, hattrick a siam nghal - hemi avang hian a lar phah hle.

Engtin zel?

Rasmus Hojlund hi feet ruk leh inches thuma sang a ni a, a palen ṭhat avangin thahrui pawh a ngah. Chutihrualin a len ngaihtuahin boruakah a ṭha tawk lo thung a, hmasawn thei turin a kum a la naupang ve bawk.

Danish striker hi ke vei lam hmang thiam a ni a, a shooting a ṭhat bakah a khalh thei bawk. A theina thlirin mual sir lama winger ni awm tak a ni a, a pian hmang thlir erawhin no. 9 tur a ni thung.

Kum 20 mi chauh a la nih avangin Hojlund hi rinrawla hman nghal tur chuan a la tuai deuh thei a, chutihrualin tuna United player thlir chuan bul ṭan nghal thei dinhmunah a ding. Hma a sawn chak viau phei chuan Erling Haaland nena khaikhin theih tur player a ni a, tunah erawh Manchester City treble champion puitu nena khaikhin a la rem chiah lo.

Man United hian season liam ta khan Burnley aṭangin Wout Weghorst chu loan hmangin an la lut a, Dutch striker hi an la nghet duh lo. Ten Hag-a'n no. 9 an mamawh tih a hria a, chutihrualin player satliaha hmun pawimawh lai hnawh khah hi a tum lo niin a lang.