Thingtlang Naupang Carlos Alcaraz

Roger Federer leh Rafael Nadal te hun a liam fel ang a, chumi hnu lawkah Novak Djokovic pawh kan mangṭha ve leh ang, chumi hnuah chuan tuin nge tennis khawvelah rorel ang a, tunge mipui lamin kan ṭan rawn tak ang tih kan inzawt ṭhin.

Mi tam tak chuan Federer, Nadal leh Djokovic te an liam hunah chuan, anni anga tennis khel ropui leh hmuhnawm hi an chhuah leh mai an ring lo, player ropuite sulhnu en chuan an rin dan hi a pawmawm hle.

Mahse, season hmasa aṭang khan khawvelin hming pakhat a hre lar hle a, tunah chuan tumah inzawh nawn a ngai tawh lo 'Carlos Alcaraz' hian player ropuite sulhnu chhui turin theihna a nei tih chu khawvel pawm dan a ni der tawh.

Grand Slam pahnihah a champion tawh a, theihna chu a nei ngei mai. Mi ropuite huanga lut tur erawhin hmabak a la ngah em em a, engtiang chena thui nge a thlen ve theih ang tih chu hunin a hril chho dawn a ni.

Player ṭhenkhat theihna nei sang leh beisei awm tak tak an lo chhuak tawh ṭhin a, rei daih loa zuizui zui ta pawh sawi tur an awm. Chuvangin Alcaraz pawh hian kawng zawh tur a la nei thui em em a, tun hi a bul ṭanna chauh tiin a sawi theih.

Thingtlang naupang

Thil nihna hrechiang tur chuan a bul ṭanna kan hriat tel a ngai ṭhin - Carlos Alcaraz chanchin hrechiang tur pawhin Spain rama thingtlang pakhat, mihring 24,000 bawr chauh chenna El Palmar (Murcia) lam kan hawi hmasak a ngai.

Tennis ngaina chhungkua aṭanga piang leh seilian a ni a, a pa chauh ni loin a pu pawhin tennis a khel ṭhin. A pu hi professional chu ni phak chiah lo mah se Spanish Championship-ah pahnihna a ni tawh, academy a nei bawk.

A pianna chhungkua in a zir bawk a, atan chuan tennis lo chu duhthlan tur dang a tam lo a ni mah zawk. Kum 2005 khan Rafael Nadal chuan a vawi khat nan Grand Slam title a la, heimi kum hian Alcaraz chu kum hnih mi chauh a la ni.

Kum thum a tling ta chiah a, hemi kum aṭang hian tennis racket a hum ṭan - heta ṭang hian zinkawng ngaihnawm tak mai chu a rawn inziak ṭan ta, a hnu lam chu inhrilh vek ngai loin a tam zawk chu kan hriat tawh sa a ni hial.

Sports psychologist pakhat, kum riat a nih aṭanga kum 16 thleng Alcaraz enkawltu Josefina Cutillas chuan, "Tuna a hun tawn hi tihpalh thil a ni lo, a naupan lai aṭang khan thil engkimah a ṭha ber nih zel a tum," tiin a sawi.

Zirtirtu Ferrero

Theihna a nei a., thil tum leh ruahmanna pawh fel tak an nei. Mahse, hlawhtlinna leh ropuina te hi mahni chauha tawn chhuah theih vek a ni bik lo a, talent a dawn sa tihpunsak turin zirtirtu a mamawh.

Kum 2003 khan Juan Carlos Ferrero-a'n French Open nomawi a chawi, hei hi Alcaraz pian cham a ni ve chiah. Ferrero hian Alcaraz hi kum 2018 thleng khan tennis a zirtir chhunzawm a ni.

Alcaraz-a'n Miami Masters 1000 title a lak hliam khan Ferrero chuan, "Midang nen an inang lo, tun hnaiah pawh world number 3 lai ni thei Alexander Zverev pawh ka lo training pui tawh a, ani hi chu a danglam.

"Carlos hi chuan player ṭhain a neih tur ang zawng zawng hi a nei kim vek maiin ka hria, kum naupangte la ni mah se a theihna hi a sang tawh em em a, chutihrualin a theihna leh thiamna hi 60% vel bak a la chhuak lo," a ti hial.

Amah hrechiangtu Ferrero thusawi hi a dik a nih ngai chuan, world number 1 Alcaraz hian tennis hmuhnawm leh ropui a la chhawp chhuak dawn chauh niin a lang a, player hlawhtling bika huanga lut turin theihna a nei tihna a ni.

Nadal ngaisangtu

Spanish mi a ni a, tennis a khelh bul ṭanna chu clay court a ni; an naupan lai leh rawlthar a nih laia an ram mai ni lo khawvel huapa player ṭha chungchuang chu Rafael Nadal a ni, a hnampui pa a ngaisang hi thil mak a ni lo a ni.

Kum 16 mi chauh a nih lai khan Alcaraz hi Nadal nen khaikhin an lo ni tawh. Alcaraz chuan, "Rafa nena khaikhin ka ni ve kha ka tan chuan chawimawina a ni a, ani ang hi chu mi pakhat chiah an awm avangin Rafa ka nei ve thei lo.

"Tennis ka khelh dan phung hi Roger Federer nen a inang ka ti a, hei mi mite min hrilh dan pawh a ni. Mahse, ka mi ngaihsan leh entawn erawh Rafa a ni thung a, ani ang nih ve theih hi ka tum leh chak chu a ni," a ti.

Kumin tir lam khan Madrid khawpuiah player pahnih hi an intawng a, rawlthar Alcaraz a chak. Nadal chuan, "A khelh dan khan min ti lawm hle, kan ramin player ṭha bik a nei hian min ti lawm," tiin a lo fak tawh a ni.

Nadal-a'n Grand Slam nomawi 22 a la thei a, amh ang nih tum Alcaraz hian a 'Idol' tluk turin major title 20 dang a lak belh a la ngai tihna a ni, thil theih loh chu ni lo mah se kawng zawh tur erawh a la nei thui takzet.

Khelh dan phung

Tennis khelhna hmun hi chi hrang hrang a awm - clay court, hard court leh grass court te hi a ball kal dan a inang lo vek a, player-te pawh an khelh thiam dan a inang lo ṭhin - Alcaraz hi chuan a hmang thiam vek tiin an sawi hial.

World number 1 ni thei naupang ber Alcaraz hian baseline aṭanga ball vuak a thiam hle, hei hi mahni inven nan a hmang kawp thei nghal bawk a, a mi ngaihsan Nadal angin 'Top Spin' a hmang nasa ṭhin hle.

A ṭul hnuah kawh leh mar taka ball vuak a thiam a, grass court inelna lian a hmachhawn zawh tak Wimbledon khan kan thlir a nih chuan Nadal aiin net bula tlan hma hun leh a tawi chia ball vuak a thiam zawk tawh emawni tih mai tur a ni.

Service a nei ṭha hi a chakna hnar a ni bawk, a service hmasa hi 140 mph zet a na te a ni ṭhin a, chawhrual pawhin 125 mph te a tling phak, inelna lian bikah service vawi hnihna a nei ṭha ṭhin bawk, hei hi player dangin an harsat ṭhin.

Feet ruka sang a nih avangin pa vantlang tak a ni a, chet muan phah khawpa lian a ni lo. A tlan chakin tharum a ngah, hei hi Nadal nen an khaikhin ṭhin chhan pawh a ni. Djokovic chuan, "Keimah, Rafa leh Roger-a a ṭha ber hi a nei khawm," tiin a fak, hei hian a funkim hle.