Zaha-a'n Galatasaray a zawm

Crystal Palace tana contract hmang zo Wilfried Zaha chuan Galatasaray a zawm. Turkish club tan hian kum thum daih contract a ziak a, an inremna avangin pound maktaduai hnih a dawng a, kum khatah pound maktaduai 3.75 a hlawh bawk ang.

Kum 30 mi Zaha hian Palace hi kum 12 mi chauh a nih laiin a zawm a, a club tan hian a hun pum a hmang zo thuak tia sawi theih a ni. Eagles tan match 458 a khel a, khel hnem pathumna niin goal 90 a khungsak bawk.

Season hmasa khan goal sarih a khung a, inkhel ṭhenkhatah chuan captain armband hrentir a ni ṭhin. Match hnuhnung pahnihah erawh malpui hliam vangin a inkhel thei ta lo a ni.

Zaha chuan, "Crystal Palace chairman Steve Parish chungah ka lawm, ka teammate, coach leh club chhunga ka ṭhian zawng zawngte chungah pawh ka lawm, anni bakah hian tawp chin nei loa min thlawptu fans chungah ka lawm," tiin a sawi.

Kum 2010 khan Zaha hian kum 17 mi chauh ni chungin senior team tan a khel ṭan a, kum 2013 khan Championship aṭangin Eagles chu Premier League-ah a kaipui a, club tan chuan a hlu vet vet hle.

Manchester United chuan an lei chhuak a, mahse Red Devils tan hian league match hnih bak a khelhsak lo. United aṭang hian loan hmangin Palace-ah bawk a khel a, a hnuah a club pangngaiah bawk a kir leh a ni.