Deloitte Football Money League Barca leh Real rorelna - United derthawnna!

Football khawvela sum che vel kum tina zir chiang ṭhintu Deloitte chuan season hmasaa European club te sum lakluh an zirchianna an ti chhuak leh ta a, a chung berah Barcelona awmin a hnuai chiahah Real Madrid an awm thung.

Barcelona hian season hmasa khan pound maktaduai 741.1 an lalut a, anmahni hnaih bertu Real Madrid lakluh zat hi pound maktaduai 667.5 a ni thung - 2017-18 season kha chuan Real Madrid hi pakhatna an ni a, a vawi khat nan DFML-ah Barca chu pakhatna an ni.  

Manchester United-in pound maktaduai 627.1 lalutin pathumna an ni a, 2017-18 season aiin an sum lakluh hi tam mah se tun season kal lai meka an sum lakluh dan thlirin Deloitte chuan an dinhmun a derthawn thu an sawi. 

Deloitte Football Money League hi vawi 23 tihchhuah a ni tawh a, kumin hi pakhatna leh pahnihna inthlauh nasat ber a ni - Real aia Barca sum lakluh tamna chu pound maktaduai 73.6 a tling. Kum khat chhung leka Barca sum lakluh pun hluaina chhan hi club sumdawnna leh licensing chungchangah midang tih tir loa anmahni control-na hnuaia an dah tak vang a ni. 

European club-te sum lakluh zirchiangtu zinga an hotupa Dan Jones chuan, "Barcelona hian marketing lama kalphung thlak dan entirna ṭha tak an hnutchhiah a, broadcasting lama club an innghat ṭhin lutuk chu an ti danglam a, anmahni thuneihna hnuaia sum lakluh tam dan an ngaihtuah a ni," a ti. 

Khelmualah result an neih ṭhat miau loh avangin United tan tlakchhiat a hnai a, 2017-18-a an sum lakluh pound maktaduai 589.8 chu 2018-19 season-ah pound maktaduai 627.1 in sang mah se kumina an club sum lakluh tur hi pound maktaduai 560-580 inkar ni tura ngaih a ni. 

Deloitte thlirlawkna hi a dik a nih chuan United hian Money League-a an hun tawn hniam ber an tawng dawn tihna a ni - a chhan bulpui ber hi Champions League an khelh loh vang a ni a, hei hian broadcasting aṭanga an sum hmuh tur tam tak a paih bo sak. Club tam zawk innghahna hi television-a an inkhel pekchhuahna aṭanga an sum hmuh a ni a, club-te sum hmuhna 445 hi broadcast deal aṭanga lokal a ni. 

Premier League hmahruaitu Liverpool sum lakluh chu 2017-18 a pound maktaduai 455.1 aṭangin pound maktaduai 533-ah a kai sang a, pasarihnaah an awm. Spurs-in an club tawn san ber tawngin pariatna an ni a, season hmasa khan pound maktaduai 459.3 an lalut. London club zingah an sang ber a, hei hi Champions League final an luh vang leh stadium thar an luah vanga sponsorhip leh broadcasting sum a pun vang a ni. DFML top 20-ah hian Premier League chu club thawh hnem ber an ni a, English top flight football-a club pariat ngawt an lang - champion lai Manchester City chu paruknaah an awm. 

Italian champion Juventus chu top 10-ah an lang ve leh ta a, Deloitte chuan Real Madrid leh Barcelona belhbawm aia instagram follower ngah zawk Ronaldo lut chu Juventus hian an hlawkpui thu an sawi. Deloitte-in club sum lakluh a chhutnaah hian player hralhna aṭanga an sum hmuh a chhut telsak lo a, top 20 chin sum lakluh belhkhawm hi pound tluklehdingawn 8.2 a tling. 2017-18 season aṭanga a punna chu 11% a tling a ni. 

French club Olympique Lyon (17) leh Napoli (20) te chu top 20-a lang thar an ni a, pound maktaduai 180 chuang ve ve an lalut thei.