DFL-Supercup-ah Bayern an chak

Tun season-a Der Klassiker (German Clasico) hmasa ber chu Nilaini zan khan Allianz Arena-ah khelh a ni a, beisei ang ngeiin a hmuhnawm. DFL-Supercup-ah hian Bayern Munich-in an elpui Borussia Dortmund 3-2 in an hneh a, nomawi an chawi.

Hansi Flick-a hote hi UEFA Champions League, Bundesliga, DFB Pokal, UEFA Super Cup leh DFL-Supercup nomawi kawltu an ni a. Niko Kovac thlaktu German manager Flick hian Bavarians hi match 40 a kaihruai tawh a, vawi 36 chakpuiin nomawi panga a chawipui tawh a ni.

Borussia Dortmund-in hliam vangin Jadon Sancho leh keeper Roman Burki te an chhawr thei lo a, nikum khan English forward hian Bayern Munich lamah goal khungin DFL-Supercup an chawi. Tun ṭumah erawh Sancho a inlan thei lo a, Lucien Favre-a'n Augsburg an hneh loh ṭum aṭangin player paruk a thlak.

Jude Bellingham, Gio Reyna, Raphael Guerreiro leh Axel Witsel te chu hahchawlhtir an ni a, captain Marco Reus-a'n inkhel bul a ṭan bakah hma tawngah Erling Haaland a awm. Bayern pawhin hliam vangin Leroy Sane an chhawr thei lo a, Champions League-a chakna goal khungtu Kingsley Coman-a'n bul a ṭan.

Hans-Dieter Flick-a'n kartawpa Hoffenheim laka mualpho team aṭangin player panga a thlak a, rawlthar Joshua Zirkzee bakah David Alaba, Jerome Boateng leh Serge Gnabry te bench-ah an awm. Chutihrualin tlarhmaah Robert Lewandowski-a'n bul a ṭan a, Thomas Muller leh Manuel Neuer te an awm bawk avangin Bayern bul ṭantute an rintlak hle.

DFL Supercup a hmeichhe referee hmasa ber Bibiana Steinhaus-i'n whistle a ham a, inkhel a hmuhnawm nghal. Bayern-in bul an ṭan ṭha a, minute 18-naah Alphonso Davies, Muller leh Lewandowski te thawhrah sengin Corentin Tolisso-a'n goal hmahruai a khung. French midfielder ball pet hi keeper Marwin Hitz-a'n dang zet mah se goalline aṭangin Tolisso hian a su goal leh ta tho.

Bayern goal nawr a na a, Borussia Dortmund an ṭang reng thei lo. Minute 32-naah Davies-a cross chu Muller-a'n ṭha zetin a tauh goal. German forward hian a tih ṭhin dan angin ding chungin ban a phar a, ring takin a au–Germany national team coach Joachim Low-a'n a ngaihdan thlak phah se titu an tam khawp ang.

Dortmund lamin tlawm mai an tum lo, Haaland-a ball pek chu Julian Brandt-a'n minute 39-naah kawh zetin a pet goal. Dinhmun ṭha taka ding tawh Bayern an talbuai zui a, minute 55-naah Thomas Delaney through ball chu Haaland-a'n um lutin siphurh sut nan a hmang.

Norwegian striker hian Bayern tlarhnung hi a su hawng leh a, amaherawhchu Manuel Neuer-a'n a ban tha chak tak hmangin a dansak. Neuer-a'n Bavarians beiseina a siamsak a, vanneihna nen minute 82-naah Joshua Kimmich-a'n chakna goal a khung.

Kimmich hian Lewandowski hnen aṭanga a ball hmuh chu goal-ah a pet a, keeper Marwin Hitz-a'n dang mah se a per chu German international player hian tlu chungin a pet goal hram. Bayern Munich 3-2 in an chak a, a vawi riat nan DFL-Supercup nomawi an chawi.

Bayern Munich manager Hansi Flick chuan, "Chak tumin kan khel a, 2-0 a hma hruai pawh kan phu. Amaherawhchu kan tihsual vangin hna a harsa a, kan chak hram a ni. Kan duh ber chu nomawi a ni a, kan chak a, engkim a fel vekah ka ngai. Kan inkhelh leh turah erawh insiamṭhat kan tum ang," tiin hmasawn zel a tum thu a sawi.

DFL-Supercup hi Thomas Muller tan a hlu lehzual, German forward hian nomawi lian tham 27 a chawina a ni a, German player zinga nomawi chawi hnem ber a ni. Muller hi World Cup (1), Bundesliga (9), DFB Pokal (6), DFL Super Cup (6), Champions League (2), UEFA Super Cup (2) leh Club World Cup (1) ah te a champion tawh a, a record hi a chhuanawm tham hle.