Mane-a'n Al-Nassr zawm a pawi ti lo

Bayern Munich forward Sadio Mane chuan Saudi Arabia Pro League club Al-Nassr zawm a rilruk a, khawthlang media-ten an tarlan dan chuan German club-a beisei phak lo forward hian Saudi lam pan a pawi ti lo.

Kum 31 mi Mane hian season hmasa khan Liverpool aṭangin Bayern hi pound maktaduai 31-in a zawm a, mahse, Germany-ah beisei a phak lo - hei vang hian Bayern hian hralh an pawi ti lo a, a kal theihna tur an ngaihtuah zawk hial niin an sawi.

Mane hian Al-Nassr hi inbiakna chu a neihpui tawh a, mahse, he thu buatsaih a nih lai hian inremna bulfuk tak a la awm lo. Senegalese forward hian Bayern-ah hian season khatah euro maktaduai 22 a hlawh mek nia sawi a ni a, Saudi club hian €40mtd hlawhtir an inhuam thung.

Liverpool legend Mane hian Al-Nassr hi zawm pawh ni se, European player langsar tak tak an kawl sa avangin a inthlahrung lutuk lo ang. Saudi club hi Cristiano Ronaldo neih vanga lar an ni a, Ronaldo bakah hian Manchester United player hlui Alex Telles leh Croatia international Marcelo Brozovic an kawl bawk.

Mane hian Liverpool-ah hun duhawm tak hmangin, season ruk chhung match 269 khelin, goal 120 zet a khung a, Bayern a pan hma season-ah hian match 51-ah goal 23 a khung.

Reds tan Premier League, FA Cup, League Cup, Champions League, UEFA Super Cup leh FIFA Club World Cup a chawi a, Anfield-ah cham zel tura ngaih ni mah se hlawh a phut hnem avangin Reds-in an chelh thei lo.

Hei vang hian Mane-a'n Germany lam hawiin Bayern a pan a, "Chona thar hmachhawn tura thutlukna siam hun tak a ni," tiin a sawi. Mahse, German club-ah hian a khelhpui Leroy Sane chu Manchester City an hneh loh hnuah kut a thlak nia sawi a ni a, squad aṭanga paih niin, pawisa chawitir a ni bawk.

Julian Nagelsmann ban a nih hnua a thlaktu Thomas Tuchel chuan, "Beisei a phak lo a ni," tiin a player chungchang hi a sawi hial a, German club-ah Mane a tlatlum lo tih a chiang.

Season hman zawh takah khan Mane hian Bayern tan match 38 khelin goal 12 a khung hram a, Tuchel chuan, "He club-ah hian inelna a sang a, a tan bul ṭan reng theih a ni bik lo. Ani pawhin chu chu a hria a, ka ngaihdan leh club ngaihdan pawh a hria," a ti a, an in 'star' lo a ni ber e!