Mizoram taekwondo cadet team zin chhuak

National Cadet Kyorugi & Poomsae Championship vawi rukna chu July 28-30 chhung hian KD Singh Babu Indoor Stadium, Lucknow-ah khelh a ni dawn, inelna hmachhawn tur hian Mizoram pawh an feh chhuak.

Mizoram team hi player 12 niin Aizawl Taekwondo Academy, Electric Vengin player panga thawhin Exodus School Taekwondo Club-in player pali an thawh. Gidae Taekwondo Club, Lunglei SAI leh Taekwondo Academy of Best Friend ten player pakhat ṭheuh an thawh bawk. Inelna chi hnih - Kyorugi (Fight) ah mi pariat an khel ang a. Poomsae (form) ah mi pali an khel thung ang.

Nimin khan kum 15 hnuai lam inelna khel tur Mizoram team te hi Mizoram Amateur Taekwondo Association chuan MATA Hall, Republic Vengthlangah thlahna hun an hmang a ni.