Record siam niah South Korea an tlawm

Hmeichhe World Cup khelh mekah South Korea an tlawm a, Colombia chu 2-0 in an hneh lo - Colombia tan hian Catalina Usme chuan penalty aṭangin goal hmahruai a khung a, South Korean keeper Yoon Young-geul tihsual zarzoin kum 18 mi Linda Caicedo chuan a belhchhah bawk.

South Korea chak loh zanah Casey Phair chuan record thar a siam - Phair hi minute 77-naah bench aṭanga luhtir niin, kum 16 leh ni 26 mi a ni a, hmeichhe World Cup-a inlan thei naupang ber record a siam a ni.

Phair hi a pa chu American niin, a nu erawh South Korean a ni a, thlah pawlh zinga South Korean hmeichhe football team-a koh hmasak ber a lo ni tawh - hmabak a nei êng hle.

South Korea hian Phair-i record duhawm siam niah hnehna chang zo lo mah se, beidawnga indawmkun mai erawh a la hun lo - match hnih khelh tur an la nei a, round of 16 luhna chance an la nei.

Hetihlai hian inelna thlengtu New Zealand pawh an tlawm - an hneh loh erawh a vawi khat nana World Cup-a inlan Philippines an ni a, mahni mualah New Zealand an mualpho, tiin a sawi theih.

Philippines tan hian Sarina Bolden chuan inkhela goal awmchhun chu minute 24-naah a khung a, hun tawp thlenga goal dang a luh loh avangin hnehna an chang - Philippines hian an match hmasa zawkah Switzerland chu 2-0 in an lo ngam lo tawh a, group A dinhmun a la chiang lo zel.

New Zealand tan pawh last 16 luh beiseina a la bo lo a, anni hian Norway chu 1-0 in an lo hneh tawh - Norway hian nimin khan Switzerland chu 0-0 in an inhnehtawkpui thung.