Everton player thar Arnaut Danjuma

Premier League club Everton chuan winger Arnaut Danjuma chu Villarreal aṭangin season khat chhung an hnena loan-a khel turin an la lut a, Danjuma hian Merseyside club tan a khel dawn tak tak ta!

Netherlands forward hian January khan Toffees hi zawm turin thutlukna a siam vek tawh a, mahse, Tottenham Hotspur lo lan hnuah a thutlukna hi sut lehin Spurs lamah a kal daih.

Spurs tan match 12 khela goal hnih khungin, London club-ah a loan hun a hmang zo a, loan hmang thoin Everton a zawm leh dawn ta a ni - Everton fans ṭhenkhat chuan an lawm lutuk lo mai thei.

Mahse, kum 26 mi winger chuan Everton a zawm loh chhan chu club enkawltu manager dinhmun chian loh vang a nih thu a sawi. Khatihlai khan Everton hian coach Frank Lampard chu an ban a, ni sarih hnuah a thlak turin Sean Dyche an la lut chauh a ni.

Everton boss Dyche hian nipui transfer-ah player pahnih a lakluhna chiah a ni a, Danjuma hma hian player tawnhriat nei ṭha Ashley Young chu a lo la lut tawh bawk.

Danjuma chuan, "Kan thawnthu hluite khan tuna he club ka zawm theihna thawnthute hi a tingaihnawm zual zawk tain ka hria. Club dang min duhtu pawh an awm a, mahse, Everton hian fans, manager leh a sulhnu te avangin min hip tlat a ni.

"Ka tan chuan vanneihna a ni e," a ti a, Merseyside club a zawm thei chu a lawm thu a sawi. Danjuma hian Netherlands tan vawi sarih khel tawhin, Champions League 2021-22 semifinal-a Liverpool-in an hneh tak Villarreal team-ah khan player pawimawh a ni phak.

Danjuma hi Spurs tana a khelh hma pawhin English football-ah hian a mikhual hran lo. Kum 2019 khan Bournemouth zawmin, Premier League leh Championship-ah season khat ve ve hun a hmang.

Kum 2021 khan Villarreal panin, match 34-ah goal 16 ngawt a khungsak a, season hmasa khan loan-a a chhuah hmain match 17 a khel hman a, goal ruk a khung - Everton-ah inchher hriam thar leh a tum ang.