Chelsea-in Gallagher hralh an phal lo

Premier League club Chelsea chuan midfielder Conor Gallagher chu tlawm taka chhuahtir an tum lo tih pholan nan West Ham dawrna an hnar a, Hammers hian pound maktaduai 40 laiin ngam mah se England international hi a chhuah an rem ti lo.

Kum 23 mi Gallagher hian Stamford Bridge-ah kum hnih cham turin contract a la nei mek a, mahse, Hammers hian an thlem chhuah theih inbeiseiin an dawr a ni - an dawrna hmasa chu hnawl a ni phawt.

Chelsea academy aṭanga inzir chhuak Gallagher hian team lian Chelsea-ah khelh hmun a chan mai loh avangin Charlton Athletic, Swansea City, West Bromwich Albion leh Crystal Palace-ah te loan-in hun a hmang hman.

Palace-ah hian a hming chherin, 2021-22 season kha a khel a, inelna hrang hrangah match 39 khelin goal riat a khung a, assist vawi nga a nei - Palace Player of the Season atan thlan nghal niin, England tan a vawi khat nan a inlan bawk.

Chelsea-in hei hi an hmu ve reng a, Stamford Bridge lamah an ko kir. Season hman zawh takah khan Blues tan hian match 45 khelin goal thum a khung a, assist vawi khat a nei bawk - Palace lama a sulhnu chu a phak lo hle.

Gallagher hi Chelsea hian chhuahtir phal lo tawp an ni lo - London club neitu tharte hian player-te chu kum hnih chiah contract an nei tawh a nih chuan, contract thar an ziak a nih loh chuan chhuahtir an duh.

Chelsea fapa rangkachak ang hiala ngaih Mason Mount an chhuahtir chhan pawh kha hei hi niin an sawi a, Manchester United lamah £55mtd-in an kaltir.

Khawthlang media-ten an tarlan dan chuan Blues hian Gallagher chelh hi an pawi ti lo a, chutihrual chuan chhuahtir pawh an pawi ti chuang lo.

London club hian an lungawina zana dawrtu an hmuh chuan an chhuahtir thei dawn tihna a ni a, Hammers hi sum tam zawk nen an lang leh a nih pawhin a mak lo ang - Gallagher hi USA-a tour nei mek Blues squad-ah a tel.