Premier League Summer Series chhunzawm dawn

Naktuk zing lam hian Premier League Summer Series chu United States-ah Premier League club paruk Chelsea, Fulham, Aston Villa, Newcastle United, Brighton & Hove Albion leh Brentford ten an khelh chhunzawm dawn. Zing dar 5:45-ah Champions League khel tur Newcastle United leh Mauricio Pochettino hnuaia indinthar tum Chelsea te an inkhel dawn a, en a châkawm khawp ang.

Hemi hma hian zing dar 3:00-ah Brentford leh Brighton te an inkhel dawn a, zing dar 4:30-ah Fulham leh Aston Villa te an inkhel bawk ang. Team parukte hian match thum ṭheuh an khel dawn a, vawi thum an khelh aṭanga point hmu sang ber hi an champion dawn. Point inang hmu an awm a nih chuan goal difference en tur a ni.

Chelsea-in match hmasa berah Brighton an hneh a; Blues hian Newcastle United leh Fulham te an hmachhawn dawn. Poch-a hote hian Brenford leh Aston Villa te an hmachhawn dawn lo tihna a ni. Blues-in Brighton an hneh ṭum hian Mykhailo Mudryk a che ṭha a, player thar Christopher Nkunku leh Nicolas Jackson te an hmuhnawm.

Newcastle United pawhin player thar Harvey Barnes an chhawr tawh a, Aston Villa nen an inkhelh ṭumin siphurh suttu zawk ni mah se an khelh danah team ṭha an ni tih an pholang. Chelsea leh Newcastle United inkhel tur hian season thara Premier League kalhmang tur thui tak a hril theih a rinawm.

Premier League Summer Series hi US-a khawpui panga Atlanta (Georgia), Harrison (New Jersey), Orlando (Florida), Philadelphia (Pennsylvania) leh Summerfield (Maryland) ah neih a ni.