ISL-ah entu awm thei dawn?

India sorkar hnuaia Ministry of Home Affairs chuan Nilaini khan Covid-19 hri leng kara state hrang hrang te leh mipuite kalzel dan tur a puang a, Unlock 5.0 hnuaia kaihhruaina aṭanga a lan danin infiamna huangah a hmunah entu an awm thei dawn. 

Covid-19 vangin infiamna hrang hrang te dan pangngai angin kalpui hleihtheih a ni lo a, football bikah pawh Indian Super League chu a hmuna entu awm loa season khar niin I League phei chu khelh chhunzawm loa tihtawp a ni. 

Sorkar ruahmanna hmasaah chuan September 21 aṭang khan infiamna lam hawi huaihawt phal a ni a, 'containment zone' (hmun khuahkhirh bik) huam chhunga mi an nih loh chuan entu mi 100 aia tam lo an awm a phal bawk. 

Unlock 5.0-in infiamna khawvel tan chanchin lawmawm a neih belh a, Ocotber 15 aṭang chuan mi 100 aia tam pawhin a hmunah infiamna te hi an en thei dawn a ni. 

Sorkar ruahman dan chuan, hmun lian lo leh mipui len tlemna, infiamna hmunah chuan a hmunhmaa mi leng zat aṭanga 50% mipui an tel phal a ni a, mahse a tam berah mi 200 aia tam an nih a thiang lo thung. 

Khelmual lian tham leh mipui punkhawm tam theihna hmunah pawh mipui kal phal a ni dawn a, hei erawh a stadium leh hmun hma len dan a zira thutlukna siam chawp zel tur a ni. 

Hetihrual hian sorkar chuan a hmuna infiamna entu te chu dan hrang hrang a zam te zawm turin a beisei dawn a, containment zone huam chhungte chu he dan thar hian a huam lo bawk. 

Indian football season thar chu November 2020-ah neih theih beisei a ni a, mahse ISL leh I League chu hmun khata khelh tur niin ISL hi Goa-in a thleng dawn a, I League hi West Bengal a neih tur a ni thung. 

Sorkar dan thar aṭanga a lan dan chuan ISL leh I League huaihawttu lam hian an duh chuan entu awmin league hi an kalpui thei dawn tihna a ni a, chutihrual chuan dan leh hrai zawm tur a tam avangin entu neih loh hi an thlang thei bawk.