Real Madrid an 'Real' zawk Atletico chak zo lo

Nilaini zan La Liga inkhelah Real Madrid chuan an mikhual Real Valladolid chu 1-0 in an hneh hram a, tun season a league match thum an khelh tawhah tlawm an la nei lo. 

Real tan hian rawlthar duhawm Vinicius Junior chuan mawhphurhna la turin a puitling tawk tawh tih pholangin he inkhela goal awmchhun hi a khung a, Real tan 'hero' a ni. 

Luis Suarez an neih thar avanga ngaihven hlawh lehzual Atletico Madrid erawhin Barcelona striker hlui hoin goal an khung thei lo a, an hneh tura ngaih Huesca chu khualmualah 0-0 in an inhnehtawkpui.

Atletico Madrid hian hnehna an chan zawh loh avangin match hnih an khelh aṭangin point li an nei tawh tihna a ni a, Real Madrid-in match thum an khelh tawh aṭangin point sarih an nei thung. 

Santiago Bernabeu a inkhelah Real Madrid hi awlsam taka chak mai tura ngaih an ni a, mahse Zinedine Zidane-a naute hian goal khung turin minute 65 an nghah thlen a ngai. 

Real tan hian Federico Valverde leh Luka Jovic te hian goal khung theihna remchang nei mah se Valladolid keeper Roberto chet ṭhat ṭum an tawng a, an vannei loh zan a ni. 

Manchester United-in loan hmanga lakluh tuma an hel mek Jovic hian season hmasa khan Real tan inelna hrang hrangah match 27 khelin goal hnih chiah a khungsak a, tun season-ah match hnih khel tawhin goal 'net' a la zawng hmu zo lo.

Real Madrid boss Zinedine Zidane chuan, "October 5 hma chuan engmah ka sawi chiang thei lo a, eng pawh thleng thei a ni," tiin Jovic chungchang a sawi a, Serbian striker hi United jersey nen kan hmu a nih pawhin a mak lo ang. 

Real-in goal khung turin minute 65 an nghah a ngai a, bench aṭanga luhtir Vinicius chuan inkhela goal awmchhun hi hnai set sawt aṭangin a khung. 

Kum 20 mi forward hian season hmasa khan Real tan inelna hrang hrangah match 38 khelin goal nga a khung a, assist vawi li a nei bawk. Rinrawl tur chuan a la nau hret niin lang mah se tun ang zela a khelh chuan khawvela footballer ṭha pawl ni turin theihna a nei. 

Brazilian forward Vinicius-a goal khung hnuah Real-in goal dang an khung tawh lo a, hnehna chang mah se an league match hmasa pathum aṭangin Zidane-a'n ngaihtuahna sen thar a mamawh tih a lang. 

Real hian an league match hmasa berah Real Sociedad chu 0-0 in an inhnehtawkpui a, match hnihnaah player 10 a khel Real Betis chu 3-2 in an hneh hram a, Valladolid lakah 1-0 in an chak leh hram bawk. 

Real Madrid tan season hmasa ṭan dawna beiseina sang tak nena an lakluh Eden Hazard a la inlan thei lo chhunzawm zel a, Belgian forward tan Spain khawpuia a mangchhia a la reh hleithei lo. 

Zidane chuan, "A hliam hi a tirah ngaihthah deuh mah ila, rin aiin a na a, engtia rei nge a chawlh dawn ka sawi thei lo. Ngai awh chho meka a inngaih laia hliamin a tlakbuak leh hi hrehawm a ti hle," tiin a forward chungchang a sawi. 

Hazard hian season hmasa khan inelna hrang hrangah match 22 khelin goal khat a khung a, assist vawi sarih a nei - tun season-ah match khelh a la nei lo. 

Kum 29 mi forward hian season hmasa khan La Liga nomawi chawi mah se a mimal ang chuan a season duhawm lo ber a nih thu a lo sawi tawh a, tun season-ah eng angin nge a lo kir theih dawn, tih chu thil hriat châkawm tak a ni ta. 

Atletico Madrid tana a match hmasa berah goal hnih khung nghalin assist a nei bawk a, mahse Luis Suarez-a'n a match hnihnaah bul a ṭan chungin a team tan result lawmawm erawh a hlawh chhuak thei lo. 

Uruguayan striker hian khelmualah minitute 61 hun a hman chhungin Huesca goalkeeper Fernández Llorente tan hna a siamsak meuh lo a, vawi hnih chiah shot a nei hman. 

Suarez thlak tura luhtir Diego Costa-a'n Barcelona striker hlui aiin khel ṭha mah se goal erawh a keng tel bik lo a, Joao Felix chuan minute 89-naah hun remchang nei mah se Huesca keeper Fernandez fakna a chang. 

Nizan khan La Liga club lian pathum zinga pakhat Barcelona chu Celta Vigo khelmualah an lut a, he thu buatsaih a nih lai hian result kan hre hman lo.