MPL-ah champion ngei kan tum - AFC sporting director

NorthEast aṭana I League champion thei awmchhun Aizawl FC chuan season ṭha zawk hman tumin hma an la a, club sporting director Hmingthansanga chuan Mizoram Premier League-a champion ngei an tum thu a sawi.

Aizawl FC hian season liam ta khan MPL final an thleng zo lo a, league round-ah pakhatna ni mah se semifinal-ah FC Venghnuai an hneh loin an tla. I Day Football-ah final thleng mah se nomawi inchuhnaah Mizoram Police an hneh lo. I League-ah hming langsar zinga mi anni nachungin pasarihna chauh an ni pha bawk.

Hmachhawp chu

AFC sporting director Hmingthana chuan, "I League khelh dan tur hi tihchian a la ni lo a, hei hian kan hmalam hun hi thui tak a hril. Season hmasa khan I League leh MPL khelh kawp kha kan thiam tawk lo a, kan result-in a tawrh phah," tiin Vanglaini a hrilh.

Hmingthana chuan sawi chhunzawmin, "MPL-ah champion ngei kan tum a, chumi tur chuan player pawh kan la ṭha. Kan player neihsa te chelh vek thei lo mah ila kan chelh ho leh lak thar hoah kan lungawi. I Day Football-ah erawh kan la inpeih hman dawn lo deuh a, chutihrualin champion ngei erawh kan tum ang," a ti.

Aizawl FC hian Zodingliana Ralte (Adinga), Lalchhanhima Sailo, Lalbiakzuala (B-tea), David Lalhlansanga, Jakob Vanlalhlimpuia, Jeremy Laldinpuia bakah goalkeeper Lalmuansanga te an chan. Season liam taa captain Lalchhawnkima leh midfielder Joseph Vanlalhruaia te hmalam hun a la chiang lo.

Hmingthana chuan, "MPL-ah foreigner chhawr theih a ni lo a, I League atan bik pathum kan lalut ang. Centre back, centre midfielder leh striker te lakluh kan tum. Mizo player pawh kan la lakluh belh ang. I League-ah hian pathumna tal nih phak kan tum," tiin an hmachhawp a sawi.

Aizawl FC-in tualchhung inelnaah nomawi chawi ngei an tum a, India ram pum huap inelnaah pathumna nih phak an tum - an awlsam dawn lo.

A enkawltu tur

Aizawl FC hian assist-ant coach atan Victor Lalbiakmawia'n an tifel tawh a, ani ho hian training pawh an ṭan tawh. I League club an nih miau avangin assistant coach atan pawh B Licence nei a ngai a, Mizo coach-ah hian B Licence nei hi 10 chuang awrh an awm.

AFC sporting director Hmingthana chuan, "Head coach hi kan tifel thuai ang. Player bik hi chu tun thlaah kan tifel thei dawn lo a, head coach erawh kan tichiang ang," tiin a sawi.

Tun thla tawp hian I Day Football khelh ṭan a ni dawn a, head coach ho hian I Day Football-ah bul an ṭan thei lo a nih pawhin MPL-ah chuan head coach hoin bul an ṭan thei ang.

Aizawl FC hian season liam taa an player pawimawh Lalmuanawma (Munez), R. Ramdinthara, Lalramsanga, R. Lalthanmawia (Amawia) leh K. Lalrinfela (Mafela) te an la chelh thei a; Mizo striker ṭha pahnih Lalrinzuala leh Lalbiakdika te bakah Chennaiyin Reserves forward Zomuansanga te an lalut tawh bawk.

MPL10-ah hian club pariat an inel dawn a; Aizawl FC, Chhinga Veng, Chawnpui FC, FC Venghnuai, Mizoram Police, Electric Veng FC, Chanmari FC leh club kai thar Project Veng, Kolasib te an inhmachhawn ang.

Goalkeeper thar Ramchhana

Aizawl FC-in CYMA Football 2023-a Venghnuai champion puitu goalkeeper Joel B. Lalramchhana an lalut. Ramchhana hian season liam ta khan FC Venghnuai chu MPL final a thlenpui a, Mizoram team-ah pawh koh a ni.

I League club-ah hian Ramchhana'n kum hnih daih contract a ziak a, AFC hian tawnhriat nei keeper Lalmuansanga an chhuahtir thung. Mizo team hian state pawn aṭangin goalkeeper an lalut a nih loh chuan Ramchhana hi first choice tur a ni dawn a, chutihrualin elpui turin Vanlalhriatpuia leh Lalhruaitluanga te an awm.

Aizawl FC-ah Sialhawk tlangval

Sialhawk tlangval R. Laldanmawia'n I League-ah Aizawl FC a champion pui tawh a, tun nipui bazarah Sialhawk left back Lalfamkima an lalut.

Famkima hian Inter Village Football 2022-ah Sialhawk final thlenpuiin hming a rawn chher a, Chawnpui FC-ah lut mah se khelhna hmun a chang pha lo.

Coach Chawngthansanga hnuaiah kumin CYMA Football-ah hming a rawn chher leh a, Aizawl FC-in an lalut.

FC Venghnuai aṭanga Aizawl FC zawmtu Lalrempuia nen khelhna hmun an inchuh ang.