Sakhming chul lo Lionel Messi

Lionel Messi hming sawi rualin 'Goal' sawi a la ngai zel a, chumi zuitu chu 'Assist' a ni bawk. A vanglai a pelh tawh hnuah pawh Messi chu midang chunga leng leh danglam bik a la ni chhunzawm zel.

Nimin khan khan Messi hian Inter Miami chu Atlanta United lakah 4-0 in a chakpui a, goal hnih a khung bakah Robert Taylor tan a siamsak a, hun tawp dawnah Atlanta tan Thiago Almando chuan penalty a hlah.

Danglamna

Inter Miami hian season an hmang ṭha lo takzet a, a zawna match 10 chhung chak ni hmel an hmuh loh hnuah Messi an nei. Argentina captain hian Lajor League Soccer la khel chiah lo mah se Leagues Cup vawi hnih a khelh tawhah a che ṭha hle, an chak ve ve a ni.

An match hmasa zawka Cruz Azul an hmachhawn ṭumin bench aṭangin a lut a, hun tawp dawnah freekick chhuih lutin chakna goal a khung nghal. Nimin zinga Atlanta an hneh ṭum pawhin khelmual chhunga langsar ber a ni.

Inter Miami hian Messi khelh thiam dan turin team an rem, coach Gerardo Martino hi Messi hrechiangtu leh a khelh dan tur ruahman thiam a ni a, kum 36 mi ni tawh mah se Messi a la ringtawk hle.

Tlarhma lamah awm mah se Mess-a'n a laiah ball a zawng nasa, midfield aṭanga a ball hmuh chu tlan puiin goal ban a pet per a, a lo let leh hi amah bawkin chang fuh lehin a khung, a goal pakhat zawk pawh Barcelona lama a thiambel sa tawh ang tho a ni.

A laiah ball a khalh lut a, mual sir lama awm Taylor pein ani hian Messi tan a laiah a cross lut, a hmun dika awm Messi tan khung a harsa tawh lo. Hun tawp dawnah Messi hian fal takin ball a khalh a, a goal hmasa luh theih nana siamsaktu Taylor a siamsak ve thung.

Messi faktu Taylor

Inter Miami tan Messi leh Taylor ten goal hnih ve ve an khung a, an goal khung tur an insiamsak tawn bawk. Statistics en chuan an dinhmun a inang viau, khelmuala an chet dan leh thawhhlawk dan erawh a inang chiah lo deuh.

Kum 28 mi Taylor chuan, "Leo-a'n ball a chan chiah khan an khingpui ten an bawr ṭhin a, keini lamin hmun awl kan neih theih phah thung. Ball a ken tawh chuan a duh duh a ti thei a ni ber a, thutlukna a siam sual ngai lo bawk.

"Kan awmna hmun a rawn zawng hmu rang thei em em a, khawvela player ṭha ber a nihna chu a takin ka bulah a lantir. Ama mimal chauh ni loin a thiamna hmangin team pumpui a siamṭha a ni," tiin a sawi.

Inter Miami hian eng inelnaah mah nomawi an la chawi ngai lo. Tunah chuan Leagues Cup-ah group J hmahruaitu an ni a, player ropui Messi ho hian a vawi khat nan an champion a nih pawhin a mak lo ang, kawng zawh tur erawh a la thui.

Leagues Cup a khelh chhunzawm dawn rih lo. August 21, Thawhṭanni zing dar 5:00 hian Charlotte an tum dawn, he inkhel hi Messi tana Major League Scoccer match hmasa ber a ni ang a, chumi hnuah US Open Cup semifinal an khek zui ang.