Hrezuala'n loan-in AFC a zawm

Lunglei Theiriat tlangval Lalhrezuala Sailung chuan loan hmangin ISL club Odisha aṭangin Aizawl FC a zawm a, season khat atan contract an ziak. Nikuma Mizoram-in NorthEast Olympic football-a gold medal an lak khan captain a ni a, match zawng zawng a khel vek.

Hrezuala hi Lunglei SYS Academy-ah caoch Lalmuankima hnuaiah a inzir chhuak a, kum 2018-ah Delhi Dynamos Under 18 a zawm. Season khatnaah Delhi Dynamos U18-ah hian a captain nghal a, kum 2019-ah senior contract a hmu nghal bawk.

Kum 2019 hian Delhi Dynamos-a awm chung siin Qatar-a football zirna school lar Aspire Academy-ah a inzir a, a rawn chhuah hian ISL club Odisha a zawm. Season hnih chhungin Odisha tan hian match 11 a khel a, goal khat a khung.

Season liam ta khan loan-in Sudeva a zawm a, I League-ah match kua a khel. CYMA Football 2023-ah khan Tlangnuam chu final a thlenpui a, Aizawl FC-in right back Hrezuala an hriatchian phah bawk.

Hrezuala chuan, "Aizawl FC tana league pawimawh tak ka khel thei tur hi ka lawm a, ka tan chuan chona thar ṭha tak a ni. Team spirit ṭha tak nei an ni tih ka hria a, sáng tak thlenpui tumin he club hi ka pan a ni.," tiin Vanglaini a hrilh a ni.