ISL legend Corominas-a'n India mangṭha

Indian Super League a hming dai tawh ngai lo tur Ferran Corominas chuan Indian football a mangṭha a, kum 37 mi striker hian season tharah chuan Spanish third division club Atletico Baleares tan a khel tawh dawn. 

FC Goa tana season thum khel tawh Coro hian season hmasa khan match 17 khelin goal 14 a khung a, assist vawi li a nei bawk. Goan club tan seaosn thum chhungin league match 57 khelin goal 48 a khung a, assist vawi 16 a nei bawk - ISL-ah ani aia goal khung hnem an awm lo. 

AFC Champions League khel tur FC Goa hian Coro hi chelh tum mah se an inrem thei lo a, Spanish forward hi ISL club dang pawhin dawr mah se an ram lama haw a thlang ta zawk a ni. 

Coro hi 2017-18 leh 2018-19 season khan ISL-ah top scorer a ni a, 2018-19 season bikah phei chuan player ṭha berah thlan niin Golden Ball a dawng a, FPAI chuan Foreign Player of the Year 2019-ah a thlang bawk. 

Espanyol tana La Liga lama season riat zet lo khel tawh Coro hian a professional career a a club hmasa ber tan hian Copa Del Rey nomawi a chawi bakah Europa League final a luhpui tawh bawk a, a sulhnu a nep lo hle.  

Spain tan age level-ah a inlan nual a, European Under-19 Championship 2002 a champion Spain U19 team zingah khan a tel a, kum 2003 a FIFA U20 World Cup final lut Spain U20-ah khan a tel bawk a ni.