Mi 100 zingah Nadal a tel ta lo

Rafael Nadal-a'n engtik niah nge tennis a khelh leh theih ang tih hriat a ni lo a, infiamna a ngainat leh hmangaih ber hi la chawlhsan chiah lo mah se hliam vanga a chawlh rih a ngai si, a inkhelh theih loh karlakah a ranking pawh a hniam ta hle.

Mipa tennis thuneitu sang Association of Tennis Professionals (ATP) ranking tharah Nadal hi 140-na a ni. Spanish star hi khel bawr hliam vangin a chawl mek a, season hmasa aṭang khan a inkhel mumal lo - tun season bikah chuan Austrlian Open hnu lamah a la inkhel leh lo.

Grand Slam vawi 22 champion tawh Nadal hian French Open a khelh theih loh tur thu kha mittui nen a puang a nih kha, chanchinbumite hmaah season thar hi a tan hun hnuhnung a nih tur thu a sawi bawk, a lo kir leh ngei ang em tih chu zawhna a ni ta zawk.

Nadal-a hnam pui Carlos Alcaraz erawh a chung berah a awm. Wimbledon champion hian Alcaraz hian grass court inelna lian a hmachhawn hma khan Novak Djokovic a nek chhuak dawn tih a chiang sa tawh a, ranking sang ber a nihna hi nomawi hmangin a nemnghet.

A chung berah awm rih lo mah se Djokovic sulhnu erawh sawi nep theih a ni lo. Serbian player hian chawlhkar 389 chhung chu number 1 nihna a lo hauh tawh a, ani aia number 1 dinhmun luah rei thei hi an la awm ngai lo a ni.

India tlangval Sumit Nagal chu a sang zual 200 zingah a tel ve leh ta thung. Nagal hian a tawn san lai ber chuan 122-na pawh a lo ni ve tawh, tun ṭumah hian Tampere Open-ah hlawhtlinna a chan avangin point 53 a hmu a, number 178-naah a inhlangkai.

Mipa doubles lamah Rohan Bopanna chu pasarihna a ni. Indian player hi kum 43 mi ni tawh mah se Wimbledon khelh zawh takah khan Matthew Ebden nena ṭangdunin semifinal hial an la thleng a ni.