Manchester City-in Bayern Munich an hneh

Japan National Stadium, Tokyo-ah nimin tlai khan Manchester City-in Bayern Munich 2-1 in an hneh. English champion tan hian James McAtee-a'n goal hmahruai khungin Bavarians-in Mathys Tel hmangin hun tawp dawnah sut mah se Pep Guardiola hote hi Aymeric Laporte-a goal hmangin an chak ta tho.

Bayern hian season ṭan hmain Kawasaki, Liverpool leh Monaco te an la hmachhawn dawn a, hemi zawh hian DFL-Supercup-ah RB Leipzig an hmachhawn ang. Manchester City pawhin Arsenal nena Community Shield khelh hmain Atletico Madrid an la hmachhawn dawn.

Captain Walker

Kyle Walker leh Bayern Munich sawi zawm a nih avangin English wing back hi a inlan dawn lo tih thawm awm mah se Pep Guardiola-a'n club tana a pawimawh thu a sawi a, Tokyo-a inkhelah pawh hian a captain tir.

Spanish manager hian Walker bakah Ederson, John Stones, Nathan Ake, Mateo Kovacic, Bernardo Silva, Jack Grealish leh Julian Alvarez te bul a ṭantir. Player naupang zawk Rico Lewis leh James McAtee ten bul an ṭan ve bawk.

Hming langsar Rodri, Erling Haaland, Phil Foden leh Kevin de Bruyne te chu bench-ah an awm. Thomas Tuchel-a'n player a luh hraw tir hret a, season liam taa bul ṭan ṭhin vek bakah RB Leipzig aṭanga an lakluh Konrad Laimer te bul an ṭan.

Bayern tana bul ṭantute hi Yann Sommer, Noussair Mazraoui, Benjamin Pavard, Dayot Upamecano, Alphonso Davies, Kimmich, Laimer, Jamal Musiala, Serge Gnabry, Leroy Sane leh Kingsley Coman te an ni. Bench-a ṭhu zingah chhuak tura sawi Sadio Mane a tel.

Goal khat

Friendly match a ni mah se club lian inkhel a ni a, manager langsar Pep Guardiola leh Thomas Tuchel ten fimkhur ten fimkhur takin an khelhtir. City-in chance ṭha nei hmasa a, chutihrualin inkhelh ṭantirh lamah Bavarians an chungnung zawk.

Musiala leh Sane ten an tlan chakna leh thiamna hmangin City tlarhnung an rum ṭhaih a, player pahnih hian chance ṭha an hlah ve ve. Sane hian freekick aṭangin a club hlui laka pet goal theihna remchang a nei a, crossbar pet per nan a hmang thung.

City an insiamrem a, minute 21-naah Rico Lewis ball pek chu Alvarez-a'n goal-ah petin Sommer-a'n dang mah se a per chu kum 20 mi McAtee-a'n a khung. English champion-in goal an khung hnuah inkhel an thunun sawt a, khelmualah tawnhriat ngah player an chhawr tlem zawk hret nachungin inkhel thununtu an ni.

Goal khat ve ve

Second half-ah team pahnih an inthlak hlawk ve ve a, City tan Haaland pawh rawn inlanin Bayern tan Sadio Mane a rawn lut bawk. De Bruyne erawh inhliam enkawl mek a nih avangin bench-ah awm mah se luhtir a ni lo.

City-in hun chanve hnu lamah player tawnhriat nei ṭha an ngah ta zawk a, inkhelah pawh an chungnung zawk. Mahse, Guardiola hote hian goal an khung belh theih miau loh avangin Bayern tan beisei tur a awm ve reng.

Minute 82-naah kum 20 Frans Kratzig cross chu kum 17 mi Paul Wanner-a'n goal-ah a pet a, keeper Ederson-a'n dang mah se a per chu kum 18 mi Mathys Tel-a'n chiang zetin a pet goal. Tel hi a kum la naupang mah se season liam taah pawh a inlan fo tawh.

Team pahnih an inhnehtawk turah a ngaih theih a, mahse City an beidawng lo a, an vannei tel bawk. Minute 86-naah City-in corner kick an hmang ṭangkai a, Bayern tlarhnung chiang takin an ṭhiat. Foden-a ball pet chu keeper Sven Ulreich-a'n dang mah se a per chu Laporte-a'n chakna goal khung nan a hmang.

Engtin zel?

Entu 65,049 hmaah City-in team ṭha an ni tih an pholang a, minute 90 chhungin Bayern aiin an ṭha zawk. Chutihrualin treble champion nawn tur chuan vanneihna chauh ni loin an khelh danah pawh insiamṭhatna tur a la tam a, Pep-a'n an ṭhat dan ber turin a la rem loah a ngaih theih.

Kevin de Bruyne a la dam loh avangin City goal nawr a na tawk lo a, chutihrualin rawlthar Rico Lewis te an rintlak ta hle. Bayern erawh season liam ta ang thoin an tlarhnung a la pawp a, chutihrualin an player thar Kim Min-jae a la khel lo tih hriat a ṭha.

Bavarians-in no. 9 an mamawh tih a lang a, Harry Kane an lalut thei a nih chuan Bundesliga chauh ni loin Champions League thleng pawhin champion beiseiawm zinga mi an ni dawn.