Last 16-ah Spain leh Japan

FIFA Women's World Cup-ah Spain leh Japan ten nimin khan an khingpui Zambia leh Costa Rica te an hneh ve ve a, group C aṭangin last 16 an lut. July 31, Thawhṭanni hian Spain leh Japan te hi an inkhel dawn a, group hmahruaitu zawnna a ni ang.

Forsyth Barr Stadium, Dunedin-ah Japan-in Hikaru Naomoto leh Aoba Fujino te hmangin minute 30 chhung lekin goal hnih a khung a, Costa Rica 2-0 in an hneh. Eden Park, Auckland-ah Spain-in an khingpui Zambia 5-0 in an sawp. La Roja tan Teresa Abelleira-a'n minute kuana leka goal hmaruai khung hnuah Jennifer Hermoso leh Alba Redondo ten goal hnih ve ve a khung.

Vawiin hian match thum a awm dawn. Champion rinkai United States-in zing dar 6:30-ah Netherlands an hmachhawn dawn a, anni pahnih hi vawi khat ve ve an chak tawh. Group E inkhel dangah Portugal leh Vietnam te chawhnu dar 1:00-ah an inkhel ang. Tlai dar 3:30-ah inelna thlengtu Australia leh Nigeria te an inkhel dawn a, Matildas (Australia hmeichhe team sawina) hi an chak leh a nih chuan last 16 an lut dawn.

FIFA Women's World Cup hi July 20 aṭanga khelh ṭan a ni a, Australia leh New Zealand-in an thleng. Inelnaah hian khawmualpui paruk aṭangin team 32 a tel a, August 3, Ninganiah group stage khelh zawh a ni ang.