Real hmaah United ṭha zawk

Tukin zing dar 6:00 hian NRG Stadium, Houston-ah Manchester United-in Real Madrid an hmachhawn lehnghal dawn a, Erik Ten Hag-a'n player ṭha zawk a chhawr tawh ang.

Man United tan Real Madrid hi fiahna a ni dawn. Champions League-a vawi 14 champion tawh Madrid hian season tharah an hmelma Barcelona lak aṭangin La Liga nomawi laklet an tum dawn. Chutihrualin Karim Benzema, Marco Asensio, Eden Hazard leh Mariano Diaz ten Santiago Bernabeu an chhuahsan a, tlarhma siamrem a ṭul dawn.

Los Blancos hian pre season-ah AC Milan an hmachhawn tawh a, 3-2 in an hneh. Federico Valverde-a'n goal hnih a khung a, season thara an hmachhuan ber tura ngaih Vinicius Jr-a'n goal khat a khung bawk.

Real hian Benzema chan mah se tawnhriat nei ṭha Toni Kroos leh Luka Modric ten team an la ho thei a; nipui bazarah Jude Bellingham leh Arda Guler te an lalut. Turkish rawlthar duhawm Guler erawhin United hi a hmachhawn thei lo ang.

Carlo Ancelotti hote hian July 30, Pathianni zing dar 2:30 hian an hmelma Barcelona an hmachhawn leh dawn a; Italian club ṭha Juventus nen an la inkhel dawn bawk. US Tour-ah Real-in match li an khel dawn a, team ṭha vek an hmachhawn dawn.

Man United-in striker an zawng mek a, no. 9 rintlak an la thei dawn em tih a la chiang lo. Hemi a nih avang hian an player neihsa an chhawr thiam a ṭul dawn a, Anthony Martial-a'n training zawm leh tawhin French forward tan fiahna ṭha tak a ni dawn.

David de Gea thlaktu tur Andre Onana-a'n training a zawm tawh a, Real Madrid hmachhawn thei dinhmunah a ding. Jadon Sancho leh Anthony te tan hmun pawimawh chang turin Los Blancos lakah chet ṭhat hi a pawimawh ang.