Man United rawltharten Wrexham an hneh lo

Manchester United-in nimin zing khan Snapdragon Stadium, San Diego-ah Wrexham an hmachhawn a, League Two club hi 3-1 in an chak. Erik Ten Hag-a hote hian pre season-ah vawi li khel tawhin an vawi khat chak lohna a ni a, chutihrualin senior team player pawimawh an tel loh avangin indawm kunna chhan tur a awm lo.

Man United hian tun hnaia an larpui 'away kit' an ha a, kawr hring nena an match hmasa berah hian an chak lo. Wrexham hmachhawn tute hi naupang rual a tih theih a, chutihrualin tawnhriat nei ṭha Jonny Evans-a'n a ho.

Ten Hag-a hote hian inkhelh ṭantirh lamah ball an chang hnem a, goal chance erawh an insiam thei lo thung. Wrexham keeper Ben Foster (United keeper hlui) tan buaina tur a awm lo.

Wrexham erawhin United keeper Nathan Bishop tan hna an siamsak a, minute 29-naah Elliot Lee-a'n goal hmahruai a khung. Aaron Hayden hmangin minute 36-naah an khung leh bawk a, goal hnih hi mual dinglam aṭanga ball vawrluh ve ve a ni.

First half injury time-ah kum 19 mi Marc Jurado hmangin Man United-in siphurh sut ṭhen a, halftime-ah 2-1 a ni. Second half ṭan chiahah United captain Daniel Gore hnawhchhuah a ni a, tawnhriat an neih tlam bakah player 10-a an khelh avangin Ten Hag-a hote an tho chhuak lo.

Minute 69-naah mawi zetin Wrexham-in Man United tlarhnung an ṭhiat a, Sam Dalby-a'n chak nemnghetna goal a khung. Goal dang a luh belh tawh lo a, League Two club 3-1 in an chak.