Fulham striker thar Jimenez

27th July, 2023

Premier League club Fulham chuan Raul Jimenez chu Wolves aṭangin an lei. Mexican striker hi pound maktaduai nga chauhin an lei a, season hnih chhung atan inremna an ziah pui a ni.

Kum 32 mi Jimenez hian English football inelna sangah hian tawnhriat a nei ṭha tawh. Benfica aṭangin pound maktaduai 30 ngawtin Wolves hi a zawm a, an club player man to ber a ni hial.

Molineux Stadium-ah season ruk hun a hmang a, inelna hrang hrangah match 166 aṭangin goal 57 a khungsak hman. A luah hliam na tak a tawrh avangin 2020-21 season kha a inkhel mumal thei ta lo zawk a ni.

Jimenez an neih belh takah chuan Cottagers hian tlarhma lamah duhthlan tur an nei ṭha dawn, tharum ngah leh goal khung thei tak striker Aleksandar Mitrovic an neih bawk avangin club dang tlarhnung tan buaipui tham an ni ang.

Chutihrualin, Serbia international Motrovic hi a dinhmun 100%-in a chiang lo. Saudi Pro League club Al-Hilal chuan lei tumin an hel a, pound maktaduai 25 nena an dawrna chu Fulham hian an hnawlsak a ni.

Jimenez chuan, "Premier League team hlun leh lar takte zinga mi ka zawm thei hi ka lawm. Fulham hi team naran an ni lo, khelmual leh fans ṭha tak an nei, match hmasa ber khelh hlan pawh ka nghakhlel tawh hle.

"Club tan ka theihtawp ka chhuah dawn a, tun hma zawng aiin Premier League-ah goal khung tam zawk ka tum ang," a ti a, a kum tam ve deuh ṭan tawh mah se goal khung theih erawh a la inring hle.

Mexican striker hian Wolves tana Premier League a khelh hmasak match 86 aṭangin goal 34 a khung. Mahse, kum 2020 khan khatih laia Arsenal defender David Luiz nen ball an inchuhna lamah na takin a hliam.

A hliam dam hnuah tun hma lama a theihna ang tak kha a la pho chhuak leh lo, match 49 aṭangin goal ruk chauh a khung. A club thar Fulham hian a theihna sang tak kha an lanchhuahtir thei ang em tih chu hunin a hril ang.

Fulham hian season thar inbuatsaih nan Pathianni zanah Chelsea an hmachhawn dawn a, chumi hnuah German club Hoffenheim nen an inkhel ang. EPL an match hmasa atan August 12, Inrinni zanah Everton an lenchilh dawn a ni.