Champion tum inumah kan hlauthawng - Jesus

Arsenal striker Gabriel Jesus chuan season hmasa lama Manchester City nen Premier League nomawi an inchuh chungchang a sawi chhuak a, boruak sangah khan an hlauthawng tih a sawi.

Mikel Arteta naute khan season an hmang ṭha hle a, ni 248 chhung tehmeuh chu EPL hmahruaitu an ni thei. Mahse, season tawp dawnah Pep Guardiola enkawl Citizens lakah an hmahruaina an hloh.

Gunners hian champion chung si loa EPL hmahruai rei ber record an siam a, hei hian nomawi a ken tel miau loh avangin awmzia a nei lo. Chutihrualin, hun rei tak hnua Champions League an khelh leh dawn tak avangin lawmna tur erawh an nei.

Jesus chuan, "Khawi lai ber aṭang khan nge kan zuih ṭan hriat a ni lo a, englai tak kha nge kan ṭhat loh bul ṭanna pawh sawi thiam a harsa. Mahse, chiang taka lang erawh boruak sangah khan kan team kha kan hlauthawng ṭhin.

"Man City erawhin boruak sangah point thum an hmu thei zel, tawnhriat an nei ṭha tawh bik kha kan danglamna chu a ni. Tunah chuan keini pawhin tawnhriat kan nei ve tawh a, boruak a danglam ang," a ti.

Kum 26 mi Jesus hian Man City tan season ruk a khel a, hetih hun chhung hian Premier League nomawu pali a chawi hman. Mahse, rinrawl ber erawh a ni ngai lo a, inkhelh tam a duh avangin North London club hi a zawm.

Jesus chuan, "Man City player tam tak kha hun rei tak awmkhawm tawh an ni a, an awmkhawm a ni satliah lo - hlawhtlinna hrang hrang an chang ho tawh, chu chuan kawng hrang hrangin a pui hle.

"Arsenal ka zawm tirh season a ni a, ṭha taka khelin kan champion theih mai pawh kha ka ring. Mahse, vanduai thlak takin kan tum ram kan thleng zo ta lo," a ti a, tun season lo awm turah erawh champion theih ngei an inbeisei thu a sawi bawk.

Gunners tan season hmasa aiin elpui hautak an tam dawn niin a lang. Man City an la ṭha reng a, Chelsea leh Liverpool ten team hmel thar an lantir dawn bawk. Erik ten Hag'a'n a duh ang goalkeeper a nei tawh a, striker lak belh a la tum bawk - champion thei team an tam dawn.

Season thar atana inbuatsaih lai Arsenal hian tukin dar 8:00 hian Barcelona an hmachhawn dawn. August 2, Nilaini zanah AS Monaco nen Emirates Cup an khel ang a, hei hi inbuatsaihna hnuhnung a ni tawh ang.

August 6, Pathianni zanah season hmasa lama an ngam loh Manchester City nen Community Shield an khel dawn, he inkhel hi chu season thar khuhhawnna a ni tawh dawn a ni.