Reece James-a'n season hmasa a harsat thu a sawi

Chelsea defender Reece James chuan season hmasa lama an team boruak a sawi chhuak a, player ṭhenkhat London club tana khelh châkna nei tawh si lo, chhuak rih bawk si loa cham an awm chuan boruak a ti ṭha lo tih a sawi.

Blues hian season hmasa khan Premier League-ah point 44 chauh an hmu a, a sang zual 10 zingah pawh tel phak loin 12-na dinhmun an luah. Champions League khel phak china awm an phak lohna chu point 27 tehmeuh a tling.

Season tira an coach Thomas Tuchel an ban a, amah thlaktu Graham Potter pawh an ban. Manager lailawk Frank Lampard pawh kha a ngheta an lak chu ni se la an ban leh hial mai thei, season tawp thleng atan chauh inremna an siam avangin a awm tluan ni maiin a ngaih theih.

Coach thar Mauricio Pochettino an nei a, tun nipui chhungin Chelsea hi nasa takin an inṭhuahfai. Kai Havertz (Arsenal), Mason Mount (Manchester United), Mateo Kovacic (Man City), Christian Pulisic (AC Milan), Kalidou Koulibaly (Al-Hilal), Edouard Mendy (Al-Ahli), Ruben Loftus-Cheek (AC Milan), N'Golo Kante (Al-Ittihad), Pierre-Emerick Aubameyang (Marseille) leh Cesar Azpilicueta (Atletico Madrid) te an chhuak tawh.

English defender James chuan, "A nihna takah chuan season hmasa khan ka hun tawn ve tawhah chuan a harsa leh khirhkhan ber a ni hial ang. Tunah erawh thil kalpung a fuhin kawng dik kan zawh ta niin ka hria.

"Player ṭhenkhat kha chuan Chelsea tana khelh chakna leh inpekna an nei lo, chuvangin team chhung boruak a ṭha thei lo. Coaching staff thar kan neih hnuah erawh boruak a danglam," a ti a, player tui lo tak chunga awmte erawh an hming a sawi chhuak lo thung.

Nipui bazar chhungin - Nicolas Jackson, Alex Matos, Diego Moreira, Christopher Nkunku, Kendry Paez leh Dujuan Richards te an nei thar a, midfielder Moises Caicedo lak tumin hma an la mek bawk.

Kum 23 mi James chuan, "Kei ngei pawhin season hmasa kha chuan harsatna ka tawk, hliam vanga World Cup khelh theih loh te kha hrehawm tak a ni a, club tan pawh match ka khel tam tawk lo hle tih ka hria.

"Tunah chuan beiseina thar nen season lo awm tur ka thlir a, hliam nei loin a ṭha thei ang bera khelh ka tum," a tiin a sawi. James hi theihna nei sang tak ni mah se season tluana chhawr theih a ni ngai lo, hliam a neih ngun vang a ni.

Chelsea hian season thar inbuatsaih nan tukin dar 5:45 hian Newcastle United an hmachhawn - Pathianni zanah Fulham nen an inkhel leh bawk ang. Inbuatsaihna hnuhnung atan Borussia Dortmund an tum dawn a, EPL an bul ṭanna chu Liverpool an ni dawn.