Swiatek umphak thei la awm lo

A dinhmun han derthawng ve deuh ṭhin mah se Iga Swiatek umphak thei an la awm lo. Hmeichhe tennis thuneitu sang Women's Tennis Association (WTA) ranking thar berah a chung ber luahtu a la ni zel.

Poland nula hi Wimbledon khelh zawh takah khan quarterfinal paltlang zo loin a tla, grass court season hi atan hun ṭha a ni ngai lo. Number 1 a nihna pawh hloh thei dinhmunah a ding hman hial.

Mahse, Swiatek chet fuh tawk loh lai pawhin player ṭha dangte an cheṭha reng thei bik chuang lo, amah hnaih bertu Aryna Sabalenka aiin point 470 zetin hma a la hruai fal zel, a hmahruaina erawh ngaihṭha taka awmna chi a ni tawh bik lo.

Tun hnaiah hmeichhe tennis player ṭha pathum an awm - Swiatek, Sabalenka leh Elena Rybakina te sawi nan 'Big Three' an hmang ṭhin, anni pathum hi ranking sang lam pathumah an intlar vek a ni.

Poland Open chu tunkar chhung huan Warsaw khawpuiah khelh a ni dawn, tualchhung nula Swiatek pawh inlanin a match hmasa berah Nigina Abduraimova chu 6-4, 6-3 in a hneh a, hnehna chang tur hian darkar khat leh minute 35 chhung hun a hmang.

Kum 22 mi Swiatek chuan, "Mahni ram ngeia tournament khelh hi chu a nuamin a hlimawm bik, mahni hnam puite ngei maiin a hmunah kan inkhel an en a, min ṭantute thawm hriat aia nuam hi thil dang a awm chuang bik lo," a ti.

Season hmasa Poland Open-ah khan Swiatek hian quarterfinal-ah Caroline Garcia a ngam lo a, a hneh loh hi a champion zui bawk. Kuminah hian a champion thei a nih chuan season kal laia nomawi pali a chawi tlinna tur a ni ang.