Cagliari-ah hun tawp hman ka tum - Ranieri

Claudio Ranieri chuan club hran hran enkawlin kal kual ṭhin mah se a rilruah Cagliari a lian reng tih a sawi a, a club hmangaih enkawl chung ngei hian football zinkawng pawh tihtawp a tum tih a sawi.

Italian coach hian 1988 aṭanga 1991 chhung khan Cagliari hi a lo enkawl tawh a, division hniam aṭangin Italian football inelna sang berah a hruai kai, hemi hnu hian European team hrang hrang a enkawl.

Club lar Napoli, Fiorentina, Valencia, Atletico Madrid, Chelsea, Juventus, Roma, Inter, Monaco leh Nantes te a enkawl a, heng bakah hian khawvel mak tih turin Leicester City chu Premier League nomawi a chawipui.

Foxes tana hlawhtlinna a chan avangin khawvelin Ranieri a hrechiang lehzual a, mahse English club nen hian an inṭhen. Kumin January thla khan Cagliari a enkawl a, Serie B playoff aṭangin Serie A khel turin a tlin pui a ni.

Kum 71 mi Ranieri chuan, "Cagliari-ah hian hun tawp ka hman ka ring, chutihrualin club lamah ni loin ram team enkawl tur ṭha tak a awm a nih erawh chuan thil dang daih a ni thung," a ti. Cagliari tan hian kum 2025 June thla thleng daih contract a nei mek.