Olympic khel tur zawn dan a la pangngai

Badminton World Federation (BWF) chuan Tokyo Olympic neih hun chu kum khata sawn hlat ni mah se player inlan tur zawnna chu tih danglam a nih loh thu an sawi a, qualifying atana hman tournament erawh a theih anga tam khelh chhunzawm a ni ang.

BWF secretary general Thomas Lund chuan, "Nakkum tir lamah hian nipui thlen hmain tournament 25 zet awm hman tura ngaih a ni a, hei vang hian Olympic khel tur thlanna chu tih danglam tumna a awm lem lo.

"Kuminah inelna a tam loh avangin nakkumah chuan a tam thei ang ber neih kan tum ang, hri leng pawhin ziaawm lam a pan zel avangin player leh tournament buatsaihtu lam tan hun ṭha a inher chhuak zel ang," a ti.

August thla khan Japan khawpui Tokyo chuan Olympic 2020 thleng tur a ni a, mahse coronavirus vangin kum khata sawn hlat a ni. A hun sawn ni mah se a hmingah pawh Olympic 2020 tih chhunzawm a ni tho dawn a ni.

Badminton huangah chuan, singles bikah ranking sang zual 16 an inlan ang; doubles huangah ranking sang pariat chin an tel thei dawn thung - inelna lian khel phak tur ringawt pawhin a kalkawngah hna hautak paltlang tur tam tak a awm.

March thla hnu lamah badminton tournament a la awm leh lo a, hei vang hian ranking hniam lam tan chuan inelna hmachhawn tam a pawimawh dawn. October 13 aṭanga khelh tur Denmark Open-ah pawh Kidambi Srikanth leh Saina Nehwal te an inlan ang.