Inter-in goal an khung hnem

Nilaini zan Serie A inkhelah Inter Milan chuan goal khung tura harsatna an neih lohzia pholangin goal nga an khung a, an mikhualna ramah 5-2 in Benevento chu an sawp. 

Antonio Conte naute hian match hnih an khelh aṭangin vawi hnih hnehna an chang tawh a, Romelu Lukaku chuan goal hnih a khung bawk - match hnih aṭangin goal thum a khung tling ta der. 

Serie A inkhel dangah season hmasa lam pawha goal khung uar tawh tak Atalanta chuan 4-1 in team ṭha Lazio an sawp a, Papu Gómez chuan Atalanta tan goal hnih a khung.

Benevento khelmualah goal khung turin Inter-in an nghah rei a ngai lo a, an striker chhuanvawr Lukaku chuan defender Achraf Hakimi siamsak chu minute khat pawh a ral hmain goal hmahruai khung nan a hmang. 

Inter tan Roberto Gag-liardini chuan minute 25-naah a khung ve leh a, minute thum a ni hman awrh tihin Lukaku chuan a belhchhah zui - Italian club tan hian Hakimi chuan a goal hmasa ber a khung a, Lautaro Martinez chuan minute 71-naah an goal ngana a khung.

Benevento tan hian Gianluca Caprari chuan goal hnih khung ve mah se Inter lamin an khung hnem hret a, a team chhanchhuah nan goal hnih a tawk zo lo. 

Inter inkhel thlirin Conte tan lawmna tur hlir tia sawi theih a ni a, a bik takin season hmasa lama a rinrawl Lukaku leh Martinez ten goal khung an la uar chhunzawm zel avangin goal khung lamah chuan harsatna an nei dawn lo niin a lang. 

Conte naute hian an match hmasa berah goal li ngawt an lo khung tawh bawk a, Fiorentina chu 4-3 in an hneh. Italian coach tan goal an chhuah tel ve zel erawh ngaihtuah ngai niin a lang a, champion tum tan goal chhuah hi ngaia neih chi a ni lo. 

Inter lawmna turin an player lakluh thar Achraf Hakimi chuan goal a khung bakah assist a nei a, he full back hi goal hmaah a hriam ṭhin hle. Midfielder Gagliardini chuan goal a khung bakah assist a nei a, Manchester United duh loh Alexis Sanchez leh Ashley Young ten assist an nei ve ve bawk. 

Season hmasa Serie A lama goal khung uar Atalanta-in an goal khung an bansan hleithei lo a, 2019-20 season Serie A a an hnuai chiaha awm Lazio chu 4-1 ngawtin an sawp. 

Atalanta hian season hmasa khan Serie A-ah goal 98 ngawt khungin Italian top flight football-ah anni aia khung hnem an awm lo a, an zia thlak an tum lo - Lazio lakah pawh minute 10-na lekah goal an khung. 

Mikhual team Atalanta tan hian Robin Gosens leh Hans Hateboer ten minute 32 chhungin goal hnih an khung a, forward Papu Gomez chuan goal hnih a rawn thawh ve bawk - Lazio tana Felipe Caicedo goal khungin awmzia a nei lo a, season hmasa European Golden Shoe dawngtu Ciro Immobile-a'n a belhchhah pui thei lo.