Manchester khaw club an chak awlsam

Manchester City leh Manchester United ten season bul an ṭan ṭha lo a, Carabao Cup-ah erawh harsatna nei loin Manchester khaw club pahnih hian quarterfinal an lut. Ole Gunnar Solskjaer hoten kartawp Premier League-a an hneh hram Brighton & Hove Albion chu 3-0 in an sawp a, Pep Guardiola hoten Burnley 3-0 bawkin an sawp bawk. 

Premier League club ṭha paruk Man City, Man United, Tottenham Hotspur, Newcastle United leh Everton ten quarterfinal an lut tawh. Nizan khan Liverpool vs Arsenal leh Aston Villa vs Stoke City te an inkhel a, he thu i chhiar meuh chuan quarterfinal khel tur a hriat kim theih tawh ang.

Manchester United manager Sols-kjaer-a'n Pathiannia Totteham Hotspur an khelh tur hre rengin player a thlak hlawk a, captain Harry Maguire pawh hahchawlhna hun pek niin defence laia Eric Bailly kawppui Victor Lindelof chiahin bul a ṭan nawn.

Midfield-ah player thar Donny van de Beek leh veteran player Juan Mata te an inlan a, pressure nei lo ang maiin bul an ṭan. Chutihrualin Brighton pawhin defender pahnih  Lewis Dunk leh Ben White te chiah bul an ṭan nawntir a, squad nei chhah zawk Man United an chungnung nghal hi a mak lo.

Spanish midfielder Juan Mata pass ṭha tak chu Odion Ighalo-a'n goal-ah a chantir thei lo a, amaherawhchu minute 44-naah Mata freekick ṭha zet chu vengtu nei lo Scott McTominay-a'n awlsam takin a tauh lut.

Second half-ah Van de Beek pass chu Mata-a'n fing takin minute 73-naah a khung a, substitute Paul Pogba-a'n minute 80-naah freekick ṭha zetin a pet goal. United keeper Dean Henderson-a'n hna a nei meuh lo a, chutihrualin English keeper hian Leandro Trossard goal khung tur ṭha takin a dang.

Mata chevel hmuhnawm tak chuan Solskjaer-a rilru a hmin zo a nih chuan match pawimawhah khelhna hun a nei thei ang a, defender Bailly pawhin Maguire kawppui turin Victor Lindelof a nek chhuak thei bawk ang. 

Manchester United boss Ole Gunnar Solskjaer chuan, "Juan Mata a khel ṭha hle, hetianga ṭhaa a khelh hian mak ka ti lo. Football a hre bel a, player fing tak a ni hrim hrim," tiin captain Mata a fak. Spanish midfielder hian United tan goal 50 a khungna chiah a ni a, January 2014-a United a zawm hnua amah aia khung tam chu Anthony Martial (71) leh Marcus Rashford (69) te chiah an awm.

Brighton manager Graham Potter chuan, "1-0 a nih laia Dean Henderson-a save chu inkhel ti danglamtu a ni a, Rashford leh Pogba te luh hnuah a harsa sawt bawk. Chutihrualin 3-0 tur chu a ni lo," tiin inkhel chungchang a sawi.

League Cup champion lai Manchester City-in Leicester City hneh lotute aṭangin player pali chauh an thlak a, Aymeric Laporte-a'n bul a ṭan bakah Kevin De Bruyne-a'n midfield a ho a, goal nawr turin Raheem Sterling leh Riyad Mahrez te an awm bawk avangin first team ang hiala chhal theih an ni.

Chutihrualin keeper Zack Steffen leh Cole Palmer ten bul an a ṭan a, kum 18 mi striker Palmer hi first team tana a bul a ṭan vawi khatna a ni. England international Sterling-a'n Burnley tlarhnung a rum ṭhaih nghal a, a hnawksak nghal hle.

Rawlthar Palmer pawhin hun ṭha a hlah a, Man City-in minute 35-naah inkhel an thunun rah an seng. Sterling-a'n first half-ah Benjamin Mendy pass ṭha zetin a pet goal a, English forward hian minute 49-naah cool takin Ferran Torres-a pass chu goal-ah a chantir leh bawk.

Man City-in chak an nemngheh nan minute 65-naah Torres-a'n goal a khung a, Sterling-a siamsak a ni. Pep Guardiola hoten 3-0 in hnehna an chang. Spanish manager chuan, "Kan khelh dan a lungawithlak a, goal kan chhuah lo hi inrintawkna kan neih nan a pawimawh. Ferran Torres-a'n theihna sang tak a nei a, amaherawhchu training kan la nei tam tawk lo a, hmasawn a la mamawh," tiin a sawi.