Asian Youth Weightlifting Championship-ah Ruatfela

Vawiin aṭanga neih ṭan tur Asian Youth and Junior Weightlifting Championship-ah Lalruatfela a tel dawn. Mizo rawlthar hi 81kg huangah a inlan dawn - August 1, Thawhlehniah inelna a hmachhawn dawn a ni.

Inelna hi Gautam Buddha University, Noida UP-ah neih tur niin August 5-ah a hmawr bawk a ni ang. Mizo weightlifting coach Malsawma Khiante chuan, "Ruatfela a inlan thei tur hi a lawmawm, a chawi sual loh chuan Youth huangah hian medal a lak a beisei awm," tiin Vanglaini a hrilh.

Tun thla tir khan Common-wealth Senior, Junior leh Youth Weightlifting Championship-ah Ruatfela hian gold medal a lo chawi chhuak tawh. 5th Khelo Youth Games-ah pawh khan silver medal a lo la tawh bawk.

Greater Noida-a Common-wealth Senior, Junior leh Youth Weightlifting Championship an neih ṭum khan Bungzung rawlthar Ruatfela hi 81kg Youth huangah India aiawhin a inlan a, snatch 125kg leh clean & jerk 155 a chawi a, total chu 280kg niin a chungnung ber.