Liverpool captain-in Saudi club Al-Ettifaq zawm dawn

Jordan Henderson chuan kum 12 hnuah Liverpool a chhuahsan tur thu a tichiang a, Reds legend Steven Gerrard enkawl Saudi Arabian club Al-Ettifaq a zawm ang.

Kum 33 mi Hendo hi Premier League awm hnua Liverpool captain hlawhtling ber a ni a; Premier League bakah inelna dang Champions League, FA Cup, League Cup, Club World Cup, Community Shield leh UEFA Super Cup-ah a champion pui vek a ni.

Henderson chuan, "Ka thih thlengin Red ka ni reng tawh ang. Zep tur a awm lo. Hun harsa chu kan tawk ngei a, mah se Liverpool-a sulhnu ka thlir kir a nih chuan a duhawm lai hlir hi ka hriat zui tur chu a ni," tiin a sawi.

Liverpool captain hian Liverpool ṭantute chu 'khawvela ṭha ber' an tih thu a sawi a, UCL 2019 final-a Tottenham an hneh chu Liverpool tana a khelh chhunga a hun duhawm ber a nih thu a sawi lang bawk.

Hendo hian June 2011 khan pound maktaduai 20-in Sunderland aṭangin Anfield hi a pan a, Reds tan hian match 492 khelin goal 33 a khung bakah assist vawi 57 a nei bawk.

English midfielder hian July thla tir khan Liverpool squad zawm turin Germany-a training camp a zawm a, mahse friendly match pahnihah a inlan lo. Al-Ettifaq hian Hendo manah hian Reds hi pound maktaduai 12 bakah a chet ṭhat dan a zirin pawisa an pek belh ang.