Barca laka goal nga khung thei Arsenal

Arsenal chuan season thar inbuatsaihna inkhelah Barcelona 5-3 in an hneh a, forward Leandro Trossard chuan North London club tan hian goal hnih a khung.

Nimin zing SoFi Stadium, Los Angeles-a inkhelah Arsenal tan Trossard bakah hian Bukayo Saka, Kai Havertz leh Fabio Vieira ten goal an khung. Barca tan Robert Lewandowski, Raphinha leh Ferran Torres ten goal an khung ve thung.

Friendly match ni mah se a hmunah entu 70,000 zet an awm a, boruak pawh a sangin an player neih ṭhat an chhawpchhuah avangin inkhel a hmuhnawm; 1-1 a nih laiin Saka chuan penalty a hlah a ni.

England international Saka hian goal a khung bakah Havertz-a'n a khung theih nana sulsutu a ni a, hlauhawm taka ball a lakluh hnuah a cross chu an lo khung. Trossard pawh a inringtawk takzet - Gabriel Martinelli tan elpui hutak a ni dawn chiang.

Arsenal manager Mikel Arteta chuan, "Kan duh ang takin kan khel chhuak thei, khatiang taka hautak kha a nih kan ring sa a ni. Goal an khung hma hle a, a hnu lam kha chu a hautak ta hle," a ti.

Barcelona lakah hian Declan Rice leh Oleksandr Zinchenko te an inlan lo. Rice hian training-na lamah hliam tenau a nei a, defender Zinchenko pawh a tihrawl a hliam bawk.

Arteta chuan, "Player 30 kan nei a, hei hi che danglam thei reng a ni. Bazar a la inhawng reng a, player dang pawh kan la neih belh thei mai thei. Theihtawp chhuahin kan inbuatsaih mek a, kan squad neihsaah pawh hian ka lawm hle," a ti.

Havertz chu a chhawr nasa dawn tih a hriat theih tawh a, player man tam Rice pawh a dam a nih chuan hmun pawimawh chang tur a ni. Chutihrualin Catalan club laka Thomas Partey chet dan en chuan elpui a nei dawn tih a chiang.

Jurrien Timber pawhin a ti kimtu nih satliah a tum lo, pre season a hman dan chhut chuan Premier League-ah pawh a hmel kan hmu ngeiin a rinawm. A player neih thar pathum hian nasa takin squad an tih chak ngei a rinawm.

August 2, Nilaini zanah AS Monaco nen Emirates Cup an khel dawn a, anmahni khelmuala an khelh tur hi season thar inbuatsaihna hnuhnung a ni tawh ang. Season thar khuhhawn nan Manchester City nen Community Shield an la khel leh bawk ang.