Mbappe-a'n Al Hilal a be duh lo

Paris Saint-Germain striker Kylian Mbappe chuan amah lei tumtu Al Hilal aiawhte lo biak a tum lo, club pahnih lo inrem tawh mah se player berin chhuah a tum loh chuan an duh ang ngawtin thil a kal thei dawn bik lo tihna a ni.

France international hian PSG tan season thar lo awm tur daih chiah hi contract a nei tawh, a pawhsei dawn loh avangin Paris club chuan nakkuma a thlawna chhuahtir ngawt ai chuan nawr chhuah an tum.

Saudi Arabian club Al Hilal chuan dollar maktaduai 333 zetin an dawr a, an sum thehchhuah phal zat hi PSG chuan an lo pawm. Khawvela player hlawh hnem fal tak nih theihna tur a ni bawk, mahse tunah chuan Mbappe hian a ngaihven duh lo.

France rama chanchinbu lar L’Equipe tarlan dan chuan Mbappe hian Al Hilal aiawhte hi biak tumna a nei lo a, a chungchang thuthar tam tak karah hian Saudi Arabia pan tumna a nei chhin rih lo a ni.

Hetihlai hian Mbappe nena khel dun Marco Verratti erawhin Al Hilal a zawm ngei dawn niin a lang ta. Italy international leh Saudi Arabian club hi an inrem tawh, hun rei vak lo hnuah contract a ziah fel a rinawm.